İrlandiya istehsallı dərman vasitəsi Azərbaycandan geri çağırılıb

İrlandiya istehsalı olan “Rovatineks kapsullar №50” dərman vasitəsinin bir seriyasının geri çağırılması barədə qərar qəbul edilib.

"Report"un məlumatına görə, bu barədə Səhiyyə Nazirliyi Analitik Ekspertiza Mərkəzi məlumat yayıb.

Bildirilib ki, “Qırxbulaq” MMC şirkətinin 2024-cü il dekabrın 20-dəki müraciət məktubuna əsasən, həmin dərman vasitəsində istehsalçı tərəfindən aparılan stabillik tədqiqatlarından sonra spesifikasiyadan kənar nəticələr əldə olunub.

Belə ki, dərman vasitəsinin 36 aylıq stabillik tədqiqatları zamanı tərkibində köməkçi maddə qismində mövcud olan zeytun yağının qeyri-spesifik qoxuya malik olduğu və analiz nəticəsində peroksid ədədinin yüksəldiyi aşkar edilib. Bu keyfiyyət qüsurunun olması səbəbindən istehsalçı onun Azərbaycanda könüllü geri çağırmaq niyyətində olduğunu qeyd edib.

Nəticədə İrlandiyanın “Rowa Pharmaceuticals LTD” istehsalçısına məxsus, “Rovatineks kapsullar №50” adlı dərman vasitəsinin geri çağırılması barədə qərar qəbul edilib.

"Bu, o deməkdir ki, yalnız 8481C seriyalı, son istifadə tarixi 12/2025 olan dərman vasitəsi geri çağırılır. Nəzərinizə çatdırırıq ki, stabillik tədqiqatlarının aparılması dərman vasitəsinin yararlıq müddətinin tədqiq edilməsi üçün olub, adi şəraitdən fərqli temperatur və rütubət göstəriciləri olan xüsusi stabillik kameralarında aparılır.

Məktubda bildirildiyinə görə, buna rəğmən sözügedən dərman vasitəsi ilə bağlı istehsalçıya hər hansı şikayət daxil olmayıb", - məlumatda qeyd olunub.