Bu il Azərbaycanda 44 nəfəri ilan sancıb

“Bu il 44 nəfər ilan sancması ilə bağlı 1 saylı Kliniki Tibbi Mərkəzin Toksikologiya şöbəsinə müraciət edib”.

Bunu “Report”a açıqlamasında həmin şöbənin müdiri, Azərbaycanın baş toksikoloqu Azər Maqsudov deyib.

Şöbə müdiri bildirib ki, aprel ayında 6, mayda 21, iyunda da 17 nəfəri ilan sancıb: “Mayda ilan sancanlardan 4-ü, iyunda isə 2-si uşaq olub. Müraciət edənlər Şirvan, Hacıqabul, Şamaxı, Qəbələ, Şəmkir, Tovuz, Yevlax, Gəncədə yaşayanlardır. İlan sancmasından ölüm faktı qeydə alınmayıb”.

A.Maqsudov bu il əqrəb sancması ilə müraciət edənlərin sayının 7 nəfər olduğunu bildirib: “Əqrəb sancanlar arasında uşaq yoxdur. Hamısı müayinə və müalicədən sonar evə buraxılıb”.