Bakı. 1 fevral. REPORT.AZ/ Qırğız Respublikasında təyyarəsi qəzaya uğrayan Türkiyənin “ACT” Hava Yolları şirkəti hadisədən zərərçəkənlərin ailələrinə yardım edəcək.
“Report” Qırğız Respublikası KİV-inə istinadən xəbər verir ki, məlumatı hökumətin mətbuat xidməti yayıb.
Qırğız Respublikası baş nazirinin müavini Muhammetkalı Abulqaziyev fevralın 1-də şirkətin nümayəndə heyətinin başçısı Celal Karabaşla görüşüb. Onlar qəza və ondan sonra yaranan vəziyyəti müzakirə ediblər.
Qeyd edək ki, yanvarın 16-da Türkiyənin "ACT" Hava Yolları şirkətinə məxsus “Boeing747”nin Bişkek yaxınlığındakı Daça SU qəsəbəsində yaşayış binasının üstünə uçması nəticəsində 4-ü ekipaj üzvü, 35 sakin ölmüş, 16 nəfər isə xəsarət almışdı.