Ermənistanda nazirlərin sayının ixtisarı haqqında qanun qəbul edilib

Ermənistan parlamenti nazirlərin sayının azaldılması haqqında qanun layihəsini səs çoxluğu ilə qəbul edib.

“Report” Ermənistan KİV-inə istinadən xəbər verir ki, sənəd hakim “Mənim addımım” fraksiyası tərəfindən parlamentə təqdim olunmuşdu. Onun lehinə yalnız bu fraksiyanın üzvləri səs veriblər. Müxalifətdə olan Çiçəklənən Ermənistan və İşıqlı Ermənistan partiyaları isə qanun layihəsinin əleyhinə səs veriblər.

Sənəd 70 səs lehinə və 40 səs əleyhinə olmaqla qəbul edilib.

Qəbul edilən sənədə əsasən, Ermənistanda nazirlərin sayı 17-dən 12-dək azaldılacaq. Bu qanun əsasında Nazirlər Kabinetinin 200-yə yaxın əməkdaşı ixtisar olunacaq.