Almaniya XİN başçısının Rusiya prezidenti ilə şam etməsinin izahatı tələb olunur

Bakı. 24 avqust. REPORT.AZ/ Almaniya xarici işlər naziri Ziqmar Qabrieldən Rusiya prezidenti Vladimir Putinlə şam yeməyi yeməsinə görə yazılı izahat tələb olunur.

“Report” dw-yə istinadən xəbər verir ki, bu haqda Almaniyanın “Yaşıllar” Partiyası hökumətə sorğu göndərib.

İnformasiyaya əsasən, “Yaşıllar” hesab edir ki, nazirdən V.Putinin maraqlarının təmin olunması üçün istifadə edirlər: “O, bu şübhəni dağıtmalıdır”.

Məlumata görə, Partiya parlamentə seçkilər keçirilənədək bu məsələyə aydınlıq gətirilməsini istəyib.

Xəbərdə bildirilib ki, Ziqmar Qabriel bu il iyunun 2-də Sankt-Peterburqda Vladimir Putin və Almaniyanın keçmiş kansleri, Rusiyanın “Rosneft” şirkətinin müşahidə şurasının üzvü Gerhard Şröderlə birlikdə şam yeyib.

“Yaşıllar” hökumətdən həmin görüşdə “Rosneft”in maraqları, “Şimal axını-2” təbii qaz kəmərinin tikintisi, Avropa İttifaqının Rusiyaya tətbiq etdiyi sanksiyaların yumşaldılması kimi məsələlərin müzakirə olunub-olunmamasına izahat verilməsini tələb ediblər.

Qeyd edək ki, bu il sentyabrın 24- də Almaniyada parlament seçkiləri keçiriləcək.