Ukraynanın iki şəhərində müvəqqəti atəşkəs elan olunub - YENİLƏNİB

Ukrayna Prezident Ofisi ölkənin Mariupol və Volnovaxi şəhərlərində müvəqqəti atəşkəsin elan olunması və humanitar dəhlizlərin açılması barədə məlumat yayıb.

“Report”un xəbərinə görə, ofis rəhbərinin müşaviri Mixail Podolyak bildirib ki, hazırda bununla bağlı işlər görülür.

“Mariupol və Volnovaxidə humanitar dəhlizlərin açılmasına hazırlıq görülür. Tərəflər dəhlzilər olan yerdə müvəqqəti atəşkəs elan edib”, - o söyləyib. 

Mariupol şəhərinin meri Vadim Boyçenko da məlumatı təsdiqləyib.

Bildirilib ki, bu addım şəhərin mühüm infrastrukturunun - elektrik enerjisi, su və mobil rabitənin bərpasına başlamağa imkan verəcək. Həmçinin Mariupolu zəruri ərzaq və dərmanlarla təmin etmək mümkün olacaq. 

Əhalinin təxliyəsi üç məntəqə üzrə bələdiyyə avtobusları ilə həyata keçiriləcək.

Rusiya tərəfi martın 5-də yerli vaxtla saat 10:00-dan etibarən Ukraynanın iki şəhərində sükut elan edib.

“Report” “RİA Novosti”yə istinadən xəbər verir ki, məlumatı Rusiyanın Müdafiə Nazirliyi yayıb.

Məqsəd Ukraynanın Mariupol və Volnovaxi şəhərlərinin sakinlərinin təxliyəsi üçün şərait yaratmaqdır.

“Ukraynanın Mariupol və Volnovaxi şəhərlərinin sakinlərinin çıxması üçün bu gün, martın 5-də saat 10-dan sükut rejimi elan olunur və humanitar dəhliz açılır”, - nazirlikdən bildirilib.

Məlumata görə, humanitar dəhliz və marşrut Ukrayna tərəfi ilə razılaşdırılıb.

Ukrayna daxili işlər nazirinin müşaviri Vadim Denisenko isə bildirib ki, Ukrayna hələ də humanitar dəhlizlərin təhlükəsizliyinə dair zəmanət almyıb. “Yalnız onların təhlükəsizliyi barədə zəmanət aldıqdan sonra humanitar dəhlizlər yaradıla bilər. Danışıqlar aparılır. Lakin təəssüf ki, biz hələ də Rusiya qoşunlarının atəş açmayacağı barədə konkret cavab almamışıq”.

Onun sözlərinə görə, Donbassda, Axtırkada vəziyyət kifayət qədər mürəkkəbdir. Həmçinin Mariupolda da durum kifayət qədər gərgindir.