"Qazprom Ermənistan" zərərlə işləyir

Bakı. 31 yanvar. REPORT.AZ/ Rusiya təbii qazın qiymətini yenidən nəzərdən keçirdikdən sonra "Qazprom Ermənistan" şirkətində vəziyyət dəyişib, şirkət "qəpikləri də saymağa" başlayıb.

"Report" xəbər verir ki, bu barədə Ermənistanın "168 jam" qəzeti yazıb.

Qəzetin məlumatına görə, dünən şirkətin bütün ofislərində iclaslar keçirilib və Rusiyanın Ermənistana verdiyi qazın qiymətini dəyişməsi ilə şirkətin artıq zərərlə işlədiyi qeyd olunub.

Bununla əlaqədar onlar Ermənistanın Baş naziri Nikol Paşinyanla Rusiya Prezidenti Vladimir Putin arasındakı danışıqların nəticəsində qazın qiyməti dəqiq müəyyənləşdirilənə qədər müfəttişlər üçün yeni iş qrafiki tətbiq etmək məvcburiyyətində qalıblar.

Daha əvvəl Ermənistanda təbii qazın qiymətinin bahalaşacağı bildirilib.