Moskvada inzibati binada yanğın baş verib, hadisə yerinə qatar cəlb edilib

Moskvanın şimal-qərbində inzibati binanın 2 min kvadratmetr sahəsində yanğın baş verib. Hadisə yerinə yanğın qatarı cəlb edilib.

“Report” xəbər verir ki, bu barədə “Moskva Dəmir Yolları”nın teleqram kanalında məlumat verilib.

"Tuşino rayonunda yerləşən binalarda baş verən yanğının söndürülməsinə yanğın qatarı cəlb edilib. Qatarın tərkibində 150 ton su və 4 ton köpük əmələ gətirən maddə olan sisternlər var", - məlumatda deyilir.

Daha əvvəl bildirilmişdi ki, Sxodnenski dalanında keçmiş zavod binasında yanğın baş verib. Orada hostel də yerləşir. Məlumata görə, 300-dən çox insan təxliyə olunub, daha 60 nəfər xilas edilib.