Litva Ukraynaya 36 ZRK verəcək

Litva hökuməti İranın pilotsuz uçuş aparatlarına qarşı mübarizədə Ukraynaya kömək olmaq məqsədilə adıçəkilən ölkəyə 36 ədəd zenit-raket kompleksi verəcək.

“Report” “RBK-Ukrayna”ya istinadən xəbər verir ki, bu barədə Litvanın müdafiə naziri Arvidas Anuşauskas məlumat verib.

“Biz artıq Ukrayna ərazisində işləməyə və Ukrayna hərbçilərinə təlim keçməyə hazır olacaq 15 təlimatçının təlimini başa çatdırmışıq. Biz həmçinin Ukraynaya pilotsuz uçuş aparatları ilə effektiv mübarizə apara bilən 36 zenit-raket kompleksi veririk”, - o deyib.

Öz növbəsində Ukraynanın müdafiə naziri Oleksiy Reznikov bildirib ki, Litvada Ukrayna hərbçilərinə Ukrayna ərazisində təlim keçməyə razılıq verən təlimatçılar hazırlanıb.

“Qeyd edim ki, Litva tərəfi təkcə ZRK operatorları yox, həm də sonradan bizim hərbçilərimizə təlim keçə biləcək təlimatçılar hazırlayır. Yəni onlar təlimçilərə təlim keçirlər. Bu da bizə imkan verir ki, Litvada təlim keçmiş ukraynalı təlimatçılarımız da ekipajlarımızı artıq Ukraynada öyrətməyə davam edə bilsin”, - o əlavə edib.