Gürcüstanın Azərbaycandakı səfirliyində seçki məntəqəsi yaradılacaq

Tbilisi. 28 sentyabr. REPORT.AZ/ Gürcüstanda keçiriləcək prezident seçkiləri ilə əlaqədar bu ölkənin Azərbaycandakı səfirliyində seçki məntəqəsi yaradılacaq.

“Report”un yerli bürosunun verdiyi xəbərə görə, bu barədə Gürcüstanın Mərkəzi Seçki Komissiyasının (MSK) bugünkü iclasında qərar qəbul edilib.

Qərara əsasən, səfirlikdə 4, 5 və 6 saylı seçki məntəqələri fəaliyyət göstərəcək. Məntəqələrdə Azərbaycanda daimi yaşayan və həmçinin müvəqqəti olan səsvermə hüququna malik, konsulluq və ya ünvan qeydiyyatında olan Gürcüstan vətəndaşları səs verə biləcəklər.

Prezident seçkiləri ilə bağlı ümumilikdə 41 ölkədə 59 seçki məntəqəsi açılacaq.

Gürcüstanda prezident seçkiləri oktyabrın 28-də keçiriləcək. Seçkilərdə iştirak etmək üçün 25 namizəd qeydə alınıb.