Gürcüstan müxalifətindən aksiya ilə bağlı yeni qərar

Gürcüstanın müxalifət partiyalarının bu gün Tbilisidə, parlamentin binası qarşısına təyin etdikləri etiraz aksiyası təxirə salınıb.

“Report”un yerli bürosu xəbər verir ki, buna səbəb ötən axşam Kutaisi şəhəri yaxınlığındakı Bağdati kəndində yaşayış evində baş verən yanğında dördü uşaq olmaqla altı nəfərin ölməsidir.

Müxalif Yeni Gürcüstan Partiyasının lideri Giorgi Vaşadze bildirib ki, aksiya faciəvi hadisə zamanı həyatlarını itirənlərin xatirəsinə ehtiram olaraq keçirilməyəcək.

Qeyd edək ki, qonşu ölkənin parlamentində bu gün yaz sessiyası açılacaq. Müxalifət partiyaları demokratik seçki sistemi tələbi ilə bu gündən qanunverici orqanın binası qarşısında etiraz aksiyalarını bərpa etməyi planlaşdırırdı.