Güney azərbaycanlı əfsanəvi futbolçu: "Bu il fitrə zəkatınızı zibil qutularına atın!"

"Bu il fitrə zəkatınızı zibil qutularına atın!"

“Report” “Azad İran”a istinadən xəbər verir ki, bunu İranın və Azərbaycanın əfsanəvi futbolçusu Əli Kərimi sosial şəbəkədə ölkə əhalisinə müraciətində yazıb.

Tehran rejiminə müxalif olan tanınmış futbolçu Əli Kərimi İran xalqına xitabən bildirib: “Bu il fitrə zəkatınızı zibil qutularına atın. Çünki zibil qutuları istənilən başqa qurumdan (hökuməti nəzərdə tutur - red.) acları daha çox doyurur”.

Əli Kərimi hücuma meyilli cinah yarımmüdafiəçisi mövqeyində çıxış edib. 2006-cı ildə İran milli komandasının tərkibində dünya çempionatında və Almaniyanın məşhur “Bavariya” klubunda çıxışları ilə tanınıb. Son illərdə Asiyanın ən yaxşı futbolçularından biri olmuş Əli Kərimini azarkeşlər “Asiya Maradona” adlandırıb. 2004-cü ildə “Asiyanın ən yaxşı futbolçusu” adını alıb. 2009-cu il iyunun 17-də Əli Kərimi İran millisinin heyətində Cənubi Koreya millisinə qarşı son oyununu keçirib. O, 2009-cu ilin prezident seçkisində Mahmud Əhmədinejadın əsas rəqibi Mirhüseyn Musəviyə dəstəyini simvolizə edən yaşıl sarğılarla Cənubi Koreya ilə oyunda meydana daxil olduğu üçün Mehdi Məhdəvikia, Hüseyn Kəəbi və Vahid Haşimianla birlikdə milli komandadan ömürlük kənarlaşdırılıb. Əli Kərimi İran millisinin heyətində 112 oyuna çıxıb, 36 qol vurub. Ramazan ayında oruc tutmaqdan imtina etdiyinə görə 2010-cu ilin avqustunda İranın “Steel Azin” klubu onu komandadan uzaqlaşdırmışdı. 2010-2011-ci il mövsümündə Almaniyanın "Şalke 04" klubunda çıxış edib.

Qeyd edək ki, Əli Kərimi 1978-ci il noyabrin 8-də Gilan əyalətinin Siyahkəl rayonunun Paşaki kəndində anadan olub. Xatırladaq ki, Gilan əyaləti əvvəllər Güney Azərbaycan ərazisinə aid olub. Tehran rejimi Güney Azərbaycan ərazisini kiçiltmək məqsədi ilə oranı ayrıb.