Qırğız Respublikasının keçmiş prezidentinin toxunulmazlığı ləğv edilə bilər

Qırğız Respublikasında xüsusi deputat istintaq komissiyası keçmiş prezident Almazbek Atambayevin hakimiyyət səlahiyyətlərindən sui-istifadə faktlarını aşkarlayıb.

“Report” “24.kg”yə istinadən xəbər verir ki, bunu iyunun 21-də Qırğız Respublikası parlamentinin xüsusi komissiyasının sədri Kanıkbek İmanaliyev bildirib.

Onun sözlərinə görə, Almazbek Atambayev prezident olduğu zaman rəqiblərinə qarşı siyasi repressiya tətbiq edib: “O, səlahiyyətlərindən istifadə edərək söz azadlığını məhdudlaşdırıb, məhkəmə hakimlərinin işinə mane olub. Bunlar sənədlərlə təsdiqlənib. Komissiya hesab edir ki, hakimiyyət səlahiyyətlərindən sui-istifadə hallarından şübhələnmək üçün əsaslar var”.

Bildirilib ki, komissiya bütün sənədləri araşdırdıqdan sonra işi Baş Prokurorluğa təhvil verəcək.

Qeyd edək ki, parlament keçmiş prezidentin toxunulmazlığının ləğv edilməsi üzrə xüsusi deputat komissiyası yaradıb. Komissiya Almazbek Atambayevin korrupsiya və vəzifə səlahiyyətlərindən sui-istifadə üzrə cinayət işini Baş Prokurorluğa təqdim etməlidir.

Almazbek Atambayev Tarix muzeyinin yenidən qurulması, ölkə paytaxtı Bişkekdə İstilik Elektrik Mərkəzinin müasirləşdirilməsi, “qanuni oğru” Əziz Batukayevin azadlığa buraxılması, ev tikmək üçün sahə almaqda ittiham olunur.