ABŞ generalı: “Münbiçdən çıxmayacağıq”

Bakı. 29 yanvar. REPORT.AZ/ "ABŞ hərbçiləri Suriyanın Münbiç bölgəsindən çıxmayacaq".

“Report” xəbər verir ki, bunu ABŞ Mərkəzi Silahlı Qüvvələri komandanı, general Cosef Votel “CNN International”a müsahibəsində bildirib.

Onun sözlərinə görə, Fərat çayının qərbində yerləşən şəhərdə YPG (terrorçu PKK qruplaşmasının Suriyadakı qolu - “Report”) üzvləri ilə əməkdaşlıq edir və onlara silah verirlər.

Terrorçular 2016-cı ildən Türkiyə sərhədindən 40 km aralıda yerləşən Münbiçdə cəmləşiblər.

Türkiyə Prezidenti Rəcəb Tayyib Ərdoğan ABŞ prezidenti və bu ölkənin başqa rəsmiləri ilə görüşdə Münbiçdən çıxmalarını və hərbçilərini təhlükəsiz bölgəyə aparmalarını istəyib: “Afrindən sonra Münbiçi də terrorçulardan təmizləyəcəyik”.