“The National Interest": "Sərhəddə gərginliyi artırmaq Ermənistan üçün risklidir"

Regiondakı gərginliyi azaldacaq yeganə yol Azərbaycan-Ermənistan sərhədlərinin demarkasiyasıdır.

“Report” xəbər verir ki, bu fikirlər ABŞ-ın “The National Interest” nəşrində dərc olunmuş “Sərhəddə gərginliyi artırmaq Ermənistan üçün risklidir” sərlövhəli yazıda yer alır.

Yazıda xatırlanır ki, məlum üçtərəfli bəyanatın imzalanmasına baxmayaraq, Azərbaycanla Ermənistan arasında gərginlik davam edir, son günlərdə isə pik həddə çatıb.

“2020-ci ilin noyabrında hərbi əməliyyatlar dayandırılandan bu yana son həftələr sərhəd boyunca atəşkəsin pozulması nəticəsində bir çox itkilər olub, atışmalar daha əvvəl qarşıdurma olmayan ərazilərə daha çox yayılır. Bu isə yaxşılıq vəd etmir”, – deyə yazıda qeyd olunur.

Yazıda həmçinin göstərilir ki, ötən ilin iyul ayında da Ermənistanın təxribatı ilə sərhəddə baş verən və azı 20 nəfərin ölümünə səbəb olan toqquşmalardan cəmi iki ay sonra hərbi əməliyyatlar başlamışdı. İndiki vəziyyət də dünya liderlərinin məsələyə münasibətini zəruri edir.

Daha sonra yazıda deyilir: "Ermənistan Azərbaycanın beynəlxalq səviyyədə bir parçası olaraq tanınan, amma 30 ilə yaxındır işğal etdikləri Qarabağdakı məğlubiyyətilə hələ də barışmır. Hazırda Baş nazir Nikol Paşinyan çətin vəziyyətdədir. Belə ki, onun Ermənistanda millətçilər üçün başlıca problem olan Qarabağa arxa çevirməsi satqınlıq kimi qəbul ediləcək, müharibəyə əl atması isə dağıdıcı nəticə verəcək. Bunun əvəzində Paşinyan və Ermənistandakı qüvvələr orta məxrəcə gələrək müharibəni başqa vasitələrlə davam edirlər. Sərhəddə kiçik səviyyəli atışmalar gərginliyi qüvvədə saxlayır, erməni xalqının düşmənə qarşı çıxması qəzəbi daha çox xaricə yönəldilir. Paşinyan bilir ki, qışda COVID-19 və münaqişə səbəbindən iqtisadi çətinlikləri daha da üzə çıxacaq. Beləcə, baş qatmaq taktikası Baş nazir üçün həyati məsələyə çevrilir".

Həmçinin o da qeyd edilir ki, əgər Paşinyan sülh istəsə belə, bunun heç bir əhəmiyyəti olmayacaq. Belə ki, Qarabağ erməniləri hələ də Ermənistanın hərbi rəhbərliyi üzərində nəzarəti əldə saxlayır. Bu səbəbdən Paşinyan atəşkəs sazişi imzaladıqdan dərhal sonra hərbi çevriliş cəhdi baş verdi. Baş nazir heç öz namizədini belə müdafiə naziri təyin edə bilmir. Bu baxımdan Baş nazirin təxribata əl atmaqdan başqa çarəsi qalmır.

“Ermənistan Azərbaycanla münasibətlərini və sərhədlərini yenidən sahmana salsa, qazanmış olar”, - deyə yazıda qeyd olunur.

Həmçinin N.Paşinyanın sərhədlər boyu Rusiya hərbçilərini yerləşdirmək xahişinin gərginliyi azaltmaq əvəzinə uzadacağı, münaqişəyə Rusiyanın da cəlb oluna biləcəyi də göstərilir: “Suriya, Liviya və Yəmən bunun sonunun necə olacağına dair misaldır”.

"The National Interest" qeyd edir ki, sülh əldə olunmayacağı təqdirdə, İrəvan daha pis vəziyyətə düşəcək. 5 ildən sonra rus sülhməramlıları bölgəni tərk etdikdən sonra, tarix yenidən təkrar oluna bilər.

"Effektiv dövlət xadimi dayanıqlı sülhlə bağlı danışıqların vaxtının yetişdiyini etiraf etməlidir. Əgər Paşinyan bunu görmürsə, qərbdəki müttəfiqləri onu müdrikcəsinə buna inandıra bilər", - nəşrdə vurğulanır.