Yuxarı

​"Rio-2016"-ya lisenziya qazanan Azərbaycan kayakçı və kanoeçilərin təlim-məşq toplanışı keçirilir

Onlar Belarus, Ukrayna və Sloveniyada hazırlaşır

Bakı. 4 may. REPORT.AZ/ "Rio-2016"ya lisenziya qazanmış Azərbaycan kayakçı və kanoeçiləri xarici ölkələrdə təlim-məşq toplanışındadırlar.

Azərbaycan Milli Avarçəkmə Federasiyasının mətbuat xidmətindən "Report"a verilən məlumata görə, bunlar 2016-cı il Rio-de-Janeyro Yay Olimpiya Oyunlarına lisenziya qazanan kanoe üzrə 4 qat dünya və 4 qat Avropa çempionu Valentin Demyanenko, kayak üzrə olimpiya çempionu İnna Osipenko-Radomskaya və kanoe-slalomçu Yure Meqliçdir.

Demyanenko Belarusun Brest şəhərindəki Avarçəkmə üzrə Olimpiya Ehtiyatları Mərkəzində şəxsi məşqçisinin rəhbərliyi altında xüsusi plan əsasında çalışır. Osipenko-Radomskaya isə Ukraynanın Kiyev vilayətindəki Obuxov avarçəkmə bazasında hazırlıq keçir. Hər iki idmançının ilk ciddi sınağı 20-22 mayda Almaniyanın Duysburq şəhərində keçiriləcək I Dünya Kubokunda olacaq.

Meqliç isə hazırda Sloveniyada təlim-məşq toplanışındadır. O, daha öncə Avstriya və İspaniyada da hazırlıq keçib. 32 yaşlı idmançını qarşıda Avropa çempionatı gözləyir. Mayın 12-də Slovakiyanın Liptovski şəhərində start götürəcək çempionat 4 gün davam edəcək.

Qeyd edək ki, "Rio-2016"da kanoe-slalom yarışları 7-11 avqustda keçiriləcək. Kayakçı və kanoeçilər isə 15-20 avqustda mübarizə aparacaqlar. V.Demyanenko 1 nəfərlik kanoe qayığı ilə 200 metr, İnna Osipenko-Radomskaya 1 nəfərlik kayak qayığı ilə 200 metr və 500 metr məsafələrə yürüş edəcək. Y.Meqliç isə 1 nəfərlik kanoe-slalom qayığı ilə çıxış edəcək.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi