Yuxarı

​Mətbuat Şurasının nümayəndələri veteran jurnalisti ziyarət edib

Əflatun Amaşov ona Mətbuat Şurasının diplomunu təqdim edib

Bakı. 6 mart. REPORT.AZ/ Azərbaycan Mətbuat Şurasının sədri Əflatun Amaşov və Şuranın Ahıl Jurnalistlər Məclisinin üzvləri 8 Mart - Beynəlxalq Qadınlar Günü ərəfəsində 75 yaşı tamam olan veteran jurnalist Mənsurə Mənsurova-Əfəndiyevanı yaşadığı mənzilində ziyarət edərək ona media ictimaiyyətinin təbriklərini və xoş arzularını çatdırıblar.

Bu barədə “Report”a Şuradan bildirilib.

MŞ sədri Əflatun Amaşov Şuranın ahıl jurnalistlərlə bağlı gerçəkləşdirdiyi “Ahıl jurnalistlərə qayğı: keçmişimizə ehtiram gələcək üçün təcrübə qaynağımızdır” layihəsi barədə məlumat verib. O bildirib ki, peşəkar fəaliyyəti məhdudlaşmış, xüsusi diqqətə ehtiyacı yaranmış veteran jurnalistlərə qayğı göstərilməsini nəzərdə tutan layihənin davamlılığı üçün başlıca səbəb gənc nəslin yaşlı qələm sahiblərinin örnək mahiyyət daşıyan həyat yolu barədə daha məlumatlı olmasına duyulan ehtiyacdır. Sonra Ə.Amaşov uzun illər ölkə nəşriyyatlarında səmərəli fəaliyyət göstərmiş M.Mənsurova-Əfəndiyevaya Mətbuat Şurasının diplomunu təqdim edib.

Ahıl Jurnalistlər Məclisinin rəhbəri Y.Kərimov və müavini Məzahir Süleymanzadə, həmçinin görüşə qoşulan tələbə yoldaşları, həmkarları yubilyarın yüksək insani və peşəkarlıq keyfiyyətlərindən söz açıb, ötən günlərin xoş xatirələrini yada salıblar.

Qeyd edək ki, M.Mənsurova 1962-1994-ci illərdə “Elm” nəşriyyatında və “Azərnəşr”də yüzlərlə kitabın redaktoru, elmi-populyar mövzularda bir sıra kitabların tərcüməçisi və tərtibçisi olub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi