“Qazprombank” PDVSA ilə müştərək müəssisəni tərk edib

Rusiyanın “Qazprombank” bankı Venesuelanın PDVSA (Petroleos de Venezuela) dövlət şirkəti ilə qurduqları “Petrozamora” müştərək müəssisəsindən ayrılıb.

“Report” TASS-a istinadən xəbər verir ki, bu barədə bankdakı mənbə bildirib.

"Bank “Petrozamora” şirkətindən dolayı sahibliyini tamamilə tərk edib, sövdələşmənin təfərrüatları açıqlanmır”, – mənbə qeyd edib.

Bundan əvvəl “Reuters” “Qazprombank”dakı mənbələrə istinadən ABŞ sanksiyalarından çəkindiyinə görə bankın PDVSA-nın hesablarını dondurduğunu xəbər vermişdi. Sonradan bu xəbərə münasibət bildirən Rusiya Prezidentinin mətbuat katibi Dmitri Peskov bu barədə xəbərdar olmadıqlarını söyləmişdi.

Daha əvvəl ABŞ hökuməti tərəfindən PDVSA-ya qarşı sanksiya tətbiq edilərək 7 milyard dollarlıq aktivlərini dondurduqlarını açıqlamışdı. Həmin sanksiyalar amerikalı şirkətlərin PDVSA-dan neft almasına qadağa qoyur. Belə sövdələşmələrdən əldə edilən vəsaitlərin qapalı hesaba köçürüləcəyi bildirilmişdi.