Yuxarı

​Neftin bahalaşmasına inanan investorların sayı azalıb

Report: Yaxın 1-2 ayda neftin qiyməti 26-36 dollar/barel intervalında qalacaq

Bakı. 22 fevral. REPORT.AZ/ Dünya bazarında hedc fondları tərəfindən neftin bahalaşması istiqamətində fyuçers kontraktlarının sayı azalıb. Rusiya ilə Səudiyyə Ərəbistanı tərəfindən hasilatın dondurulmasına dair müəyyən anlaşmanın əldə edilməsi ilə bağlı gözləntilərinə baxmayaraq, investorlar və treyderlərin neftin bahalaşmasına yatırdıqları vəsaitin həcmi son 7 ayda ən maksimal həcmdə azalıb. ABŞ-ın xammal fyuçersləri ilə Ticarət Komissiyasının hesabatına görə, fevralın 9-16-da WTI markalı neft üzrə investorların uzun mövqeləri 5,3% azalıb.

Kanadanın "TD Securities" investisiya şirkətinin Xammal strategiyası Departamentinin rəhbəri Bart Melekin "Bloomberg"ə verdiyi məlumata görə, Rusiya ilə S.Ərəbistanı arasındakı anlaşma həyata keçsə də, bu, neft bazarında təklifin həcminə təsir etməyəcək. Onun fikrincə, İran bazarda mövqelərini bərpa etmək üçün əlindən gələni edəcək.

Cümə günü isə ABŞ-da aktiv neft buruqlarının həftəlik ənənəvi sayı açıqlanıb. "Baker Hughes" şirkəti tərəfindən verilən hesabata görə, aktiv neft buruqlarının sayı fevralın 12-19-da 26 ədəd və ya 6% azalaraq 413 təşkil edib.

"Report"un analitik qrupu hesab edir ki, müxtəlif istiqamətli neft xəbərlərinin açıqlanması neftin qiymətinin müəyyən diapazonda qalmasına səbəb olub. Belə ki, neftin yaxın 1-3 ayda 26-36 dollar/barel intervalında qalacağı ehtimal olunur.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi