Bakı. 28 iyun. REPORT.AZ/ "Kredaqro" bank olmayan kredit təşkilatının (BOKT) məcmu aktivləri 2016-cı ilin əvvəlinə 35,355 mln. manat təşkil edib. "Report" BOKT-un maliyyə hesabatına istinadən xəbər verir ki, bu, 2014-cü illə müqayisədə 20% azdır.
Ötən il ərzində "Kredaqro"nun cəmi öhdəlikləri 7% artaraq 31,318 mln. manat, cəmi kapitalı isə 73% azalaraq 4,037 mln. manat olub.
Hesabat ilində BOKT-un aktivlərinin 81,4%-ni və yaxud 28,79 mln. manatını müştərilərə verilmiş xalis kreditlər təşkil edib. Bu, 2014-cü ilə nisbətən 6,2% azdır.
Ötən il "Kredaqro"nun öhdəliklərinin 99,2%-ni və yaxud 31,081 mln. manatını isə banklara və digər maliyyə institutlarına ödəniləcək vəsaitlər təşkil edib. Bu da əvvəlki illə müqayisədə 7,7% çoxdur.
Hesabat dövründə BOKT 3,793 mln. manat faiz mənfəəti əldə edib, qeyri-faiz əməliyyatlarında isə 14,514 mln. manat zərərə düşüb. Son nəticədə "Kredaqro" 2015-ci ili 10,721 mln. manat zərərlə başa vurub. Halbuki, 2014-cü ildən BOKT 1,957 mln. manat xalis mənfəətlə çıxıb.