Bakı. 22 noyabr. REPORT.AZ/ "Bank of Baku" ASC milli valyutada qəbul etdiyi əmanətlərin illik faiz dərəcəsini 1-1,5 faiz bəndi artırıb.
Bu barədə "Report"a bankdan bildirilib.
Məlumata görə, hazırda "Bank of Baku"da 1 il müddətinə manatla yerləşdirilmiş əmanətlərə görə faizlərin aylıq və yaxud müddətin sonunda götürülməsindən asılı olmayaraq illik 15% dividend ödənilir. Bu, son bir ayda "Bank of Baku"nun manat əmanətlərinin bahalaşdırılması ilə bağlı atdığı 2-ci addımdır. Oktyabrda bank milli valyutada qəbul etdiyi əmanətlərin illik faiz dərəcəsini 12-13%-dən 13,5-14%-ə çatdırıb.
Bankın ABŞ dolları və avro ilə əmanət qəbulu şərtlərində isə dəyişiklik yoxdur.
Xatırladaq ki, "Bank of Baku" 1994-cü ildən fəaliyyət göstərir. Onun nizamnamə kapitalı 52,87 mln. manatdır. Bu məbləğ hər birinin nominal qiyməti 15,55 manat olan 3,4 mln. səhm əsasında formalaşıb. Səhmlərin 35%-i Türkiyənin "NAB Holding"inə, 31,11%-i Hikmət Abuzər oğlu İsmayılova ("Azsığorta" ASC-nin 100%-lik səhmdarı), 28,89%-i "Azpetrol" Neft Şirkəti" MMC-yə, 5%-i isə Elçin Həmid oğlu İsayevə (Müşahidə Şurasının sədri) məxsusdur.