Yuxarı
    Bağlamaq

    Bakıda qlobal kapital bazarları müzakirə olunub - YENİLƏNİB

    Tədbirdə Azərbaycan kapital bazarının inkişaf perspektivləri müzakirə edilib

    İlk xəbər saat 18:06-da verilib 

    Bakı. 20 oktyabr. REPORT.AZ/ Bu gün ADA Universiteti və "SOCAR Capital" şirkətinin təşkil etdiyi "Qlobal kapital bazarlarında fəaliyyət və uğurlar" mövzusunda tədbir keçirilib.

    "Report" xəbər verir ki, konfransda dünyanın və Azərbaycanın kapital bazarlarında baş verən proseslər, ölkədə bu sahədəki yeniliklər və əldə edilən uğurlar, eləcə də gələcəkdə maliyyə və kapital bazarlarında gözlənilən dəyişikliklər və bu prosesdə texnoloji yeniliklərin rolu barədə müzakirələr aparılıb.

    Konfransda ADA Universitetinin tələbə-müəllim heyəti, SOCAR rəhbərliyi, "SOCAR Capital" şirkətinin rəhbərliyi və ekspertləri, ölkənin bir sıra bank və biznes strukturlarının nümayəndələri, müstəqil ekspertlər və mətbuat nümayəndələri iştirak ediblər.

    Tədbirdə qlobal kapital bazarları, bu sahədəki yeniliklər, texnoloji yeniliklərin rolu ilə bağlı maraqlı təqdimatlar edilib.

    "İqtisadiyyat 2.0" mövzusunda təqdimatla çıxış edən maliyyə bazarları üzrə Türkiyənin tanınmış eksperti, SOCAR-ın kapital bazarları üzrə baş məsləhətçisi Ali Ağaoğlu dünyada baş verən texnoloji yeniliklər və bu yeniliklərin maliyyə-kapital bazarlarına təsiri, eləcə də qarşıdakı 10 il ərzində gözlənilən yeniliklər haqqında danışıb. A.Ağaoğlu bildirib ki, hazırda davam edən texnoloji inqilab dünya iqtisadiyyatının quruluşunu və xəritəsini sürətlə dəyişməkdədir. Yeni texnologiyalara əsaslanan "rəqəmsal dünya" və yeni istehlakçılar təbəqəsi formalaşır, yeni enerji mənbələri isə neft bazarını kökündən dəyişir. Kapital bazarlarında yaranan yeni xidmətlər və məhsullar, o cümlədən kriptovalyutalar ənənəvi xidmətlərlə rəqabətdədir. Bütün bunlar insanların həyatına və yaşam tərzinə də ciddi yeniliklər gətirəcək.

    Konfransda "PASHA Holding"in İdarə Heyəti sədrinin I müavini Cəlal Qasımov "Kapital bazarları bank sektorunun inkişafına necə dəstək verə bilər?" mövzusunda təqdimatla çıxış edib. Onun sözlərinə görə, hazırda yeni yanaşmalara əsasən, kapital bazarları və bank sistemi bir-birini tamamlamalı və bir yerdə inkişaf etməlidir. Təqdimatda bildirilib ki, Azərbaycanda bank sisteminin kapital bazarlarından geniş maliyyələşmə təmin edə bilməməsi, əsasən, bazarın dərin olmaması ilə əlaqədardır. Belə ki, kapital bazarlarının dərinliyini xarakterizə edən göstəricilər üzrə Azərbaycan bir sıra dünya ölkələrindən, o cümlədən orta gəlirli ölkələrin orta göstəricisindən əhəmiyyətli dərəcədə geri qalır. Bu isə ölkədə həmin sahənin inkişafı üçün böyük potensialın olduğunu göstərir.

    C.Qasımov bildirib ki, kapital bazarları və bank sistemi arasındakı əlaqənin işlək hala gəlməsində əsas şərtlərdən biri maliyyə və real sektordakı şəffaflıqdır.

    Tədbirdə "Kapital bazarları. Yeni era" mövzusunda təqdimatla çıxış edən Bakı Fond Birjası (BFB) İdarə Heyətinin sədri Vüqar Namazov Azərbaycanın qiymətli kağızlar bazarı, buradakı alətlər, bazar iştirakçıları, emitent və investorlar üçün yaradılan imkanlar haqqında geniş məlumat verib. Onun sözlərinə görə, kapital bazarınının inkişafı üçün texnoloji, qanunvericilik və qabaqcıl xarici təcrübəyə əsaslanan yeniliklər edilib, Birjada müasir bazar infrastrukturu qurulub. Son dövrlər qiymətli kağızlar bazarında baş verən ən mühüm yeniliklərdən biri isə çevik və likvid maliyyə aləti olan SOCAR istiqrazlarının buraxılması olub. BFB rəhbəri bildirib ki, yeni texnologiyalar kapital bazarlarına da ciddi yeniliklər gətirib, o cümlədən investorların bazarlara çıxışını sadələşdirib.

    Tələbələr tərəfindən böyük maraqla qarşılanan təqdimatlar interaktiv müzakirələr və sual-cavabla davam edib.

    Konfransda belə tədbirlərin və burada səslənən məlumatların tələbələr üçün olduqca vacib və faydalı olduğu qeyd edilib. Bildirilib ki, bu biliklər sürətlə dəyişən iqtisadi aləmdə gənc mütəxəssislərin formalaşması və onların gələcək fəaliyyəti üçün mühüm rol oynayır. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi