Yuxarı

​Azərbaycanda dollara tələbat artıb

Mərkəzi Bank dünən valyuta bazarına 94 mln. dollar çıxarıb

Bakı. 11 noyabr. REPORT.AZ/ Keçən həftənin cümə günü, noyabrın 6-dan etibarən Azərbaycanda yenidən xarici valyutaya tələbat artıb. "Report" xəbər verir ki, xarici valyutaya tələbatın artmasına səbəb ABŞ-da açıqlanan işsizlik rəqəmlərinin gözlənildiyindən çox yaxşı olmasıdır. Belə ki, 180 min nəfər səviyyəsində proqnozlaşdırılan yeni iş yerlərinin sayı faktiki 271 min olub. Bu göstəricinin açıqlanmasından sonra ABŞ Federal Ehtiyat Sisteminin (FES) dekabrda uçot dərəcəsini artırması ehtimalı yüksəldiyindən, dünya bazarında dollara tələb artıb. Beynəlxalq valyuta bazarlarında avronun məzənnəsi 1,07 USD/EUR-ya kimi geriləyib.

Azərbaycan Mərkəzi Bankı (AMB) dünya bazarına paralel olaraq və bivalyuta məzənnə siyasətinə əsaslanaraq dolların məzənnəsini yüksəltməyə, avronun məzənnəsini isə endirməyə başlayıb. Dolların daha da yüksələcəyini proqnozlaşdıran əhali yenidən çox güclü olmasa da, valyuta alışını artırıb. Nəticədə, dolların valyutadəyişmə məntəqələrinə satış məzənnəsi 1,0535-1,0580 AZN/USD-yə yüksəlib. 

"Bu gün isə valyuta siyasətində dəyişiklik olub və AMB hər iki valyutanın, həm dollar, həm də avronun məzənnəsini artırıb. Bu siyasət bir neçə gün davam edərsə, artıq manatın yumşaq devalvasiyasına start verildiyini demək olar", - deyə "Report"un analitik qrupu qeyd edir.

Qeyd edək ki, AMB dünən valyuta bazarında 93,9 mln. dollarlıq intervensiya həyata keçirib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi