“Bank Respublika”nın I rübdəki göstəriciləri ötənilki nəticələrini üstələdi

Bu il 30-cu ildönümünü qeyd edən “Bank Respublika” asc 2022-ci ilin birinci rübü üzrə maliyyə nəticələrini açıqlayıb. Hesabata əsasən, Bank dinamik inkişafını davam etdirərək, ölkənin bank sektorunun liderlərindən biri statusunu bir daha təsdiqləyib.

1 aprel 2022-ci il tarixinə bankın aktivləri 1,25 milyard manatdan çox olub ki, bu da ötən ilin eyni dövrü ilə müqayisədə 12% çoxdur. Açıqlanmış hesabatdan həmçinin görünür ki, Bank davamlı inkişaf üçün kifayət qədər yüksək kapital ehtiyatına malikdir. Belə ki, Bankın məcmu kapitalı 14% artaraq 99,4 milyon manat olub və minimum məcmu kapital normasını təqribən 2 dəfə üstələyib.

2021-ci ilin I rübü illə müqayisədə Bankın xalis faiz mənfəəti 62% artaraq 18,4 milyon manata, xalis əməliyyat mənfəəti 3 dəfə artaraq 5,7 milyon manata, xalis mənfəəti isə 6,04 milyon manata çatıb ki, bu da ötən ilin müvafiq dövrü ilə müqayisədə 2 dəfədən çoxdur.

Hesabata əsasən, ötən illə müqayisədə Bankın kredit portfeli 60,4% artıb və verilən kreditlərin əsas hissəsi həm Bank həm də Azərbaycan iqtisadiyyatı üçün prioritet sahə olan real sektorun kreditləşməsinə yönəldilib. Diqqət çəkən məqamlardan biri də odur ki, keçən ilin sonu ilə müqayisədə qeyri-işlək kreditlərin (NPL) bankın ümumi kredit portfelindəki payı da azalaraq 0,8% təşkil edib. Martın sonuna bankın depozit portfeli 774,9 milyon manat təşkil edib ki, bu da müştərilərin banka olan yüksək inamını və loyallığını bir daha təsdiqləyir.

Bundan başqa, Bankın I dərəcəli kapitalın adekvatlıq əmsalı 8,29%, məcmu kapitalın adekvatlıq əmsalı isə 11,83% təşkil edib ki, bu da normadan müvafiq olaraq 1,7 dəfə və 1,2 dəfə çoxdur.

“Bank Respublika” 1992-ci ildə yaradılıb və Azərbaycanın 5 aparıcı bankından biridir. Bankın səhmdarları arasında Almaniyanın ən böyük maliyyə institutu – “Sparkassen International Development Trust” (“Sparkassen-Finanzgruppe” maliyyə qrupunun üzvü) var. Bank Azərbaycanın bank sektorunda ən yüksək beynəlxalq reytinqlərdən birinə - "Müsbət" proqnozlu "B3" reytinqinə (Moody's) malikdir.

Daha ətraflı məlumatı bankın rəsmi web saytında, facebook, instagram, linkedin səhifələrində və yaxud Bankın Çağrı Mərkəzinə 144 nömrəsinə zəng edərək əldə edə bilərsiniz.