Vüsal Qasımlı: “Azərbaycanda alıcılıq qabiliyyəti pariteti əsasında minimum əmək haqqı Ermənistandan 2 dəfə çoxdur”

“Alıcılıq qabiliyyəti paritetinə görə, Azərbaycanda minimum əmək haqqı 595 ABŞ dollarıdır.

“Report” xəbər verir ki, bunu jurnalistlərə açıqlamasında İqtisadi İslahatların Təhlili və Kommunasiya Mərkəzinin icraçı direktoru Vüsal Qasımlı deyib.

Onun sözlərinə görə, bu baxımdna Azərbaycan Ermənistanı 2,1 dəfə üstələyir.

“ABŞ-da orta hesabla 1 dollara alınan malı Azərbaycanda 0,25 dollara və yaxud 0,43 manata almaq olur. Bu il ölkədə maaşların aşağı həddi 2 mərhələdə artırılaraq 130 manatdan 250 manata çatdırılıb. Hazırda Azərbaycanda minimum əmək haqqı ölkə üzrə yaşayış minimumunu 40% üstələyir. Bu artım ölkədə orta aylıq əmək haqqının da artımına göstərir və bu ilin sonuna qədər maaşların orta həddi təxminən 15 faiz artaraq 625 manata çatacaq”, - deyə V.Qasımlı qeyd edib.

O həmçinin əlavə edib ki, Prezident İlham Əliyevin rəhbərliyi ilə 2019-cu ildə reallaşdırılmış inqilabi sosial islahatlar 4 milyondan çox insanı əhatə edib: “Sosial islahat paketi minimum əmək haqqının, minimum pensiyanın, eyni zamanda, təqaüd və müavinətlərin artırılmasını, eləcə də problemli kreditlərin həllini özündə ehtiva edir. Bu islahatların maliyyə yükü 3,9 milyard manat olub və 4,2 milyon nəfəri əhatə edib".