Azərbaycanda TOP3-ə daxil olan bankların kredit portfelində payı bir qədər də artıb

Azərbaycanın bank sektoru aşağı və orta təmərküzləşmə səviyyəsi ilə xarakterizə olunur.

"Report" xəbər verir ki, bu barədə Azərbaycan Mərkəzi Bankının (AMB) "2024-cü ilin I yarısı üzrə Maliyyə sabitliyi hesabatı"nda bildirilir.

Sənəddə deyilir ki, sektorun təmərküzləşmə səviyyəsini qiymətləndirmək üçün beynəlxalq təcrübədə istifadə olunan "Herfindahl-Hirschman İndeksi" (HHİ) indeksi bu ilin I yarısında bankların kredit portfeli üzrə 1 196 (aşağı təmərküzləşmə səviyyəsi 2023-cü ilin sonunda 1 147 olmaqla qeydə alınıb), depozit portfeli üzrə - 1 604 (orta təmərküzləşmə səviyyəsi 2023-cü ilin sonunda 1 589 olmaqla qeydə alınıb), aktivlər üzrə 1 484 (aşağı təmərküzləşmə səviyyəsi 2023-cü ilin sonunda 1 504 olmaqla qeydə alınıb) təşkil edib.

“Bütövlükdə yanvar-iyun aylarında sektorda təmərküzləşmənin səviyyəsi çox dəyişməyib”, - AMB vurğulayıb.

Bununla yanaşı, qurum 6 ayda kredit portfeli üzrə TOP3-də yer alan bankların bazar payının artdığını qeyd edib. O cümlədən, onların xüsusi çəkisi 1,4 faiz bəndi artıb - 53,8 %-ə qədər (2023-cü ildə 4 faiz bəndi artım olub).