Azərbaycanda nağd pul kütləsinin artımı davam edir

Bakı. 14 fevral. REPORT.AZ/ Azərbaycanda dövriyyədə olan nağd pul kütləsinin həcmi 2017-ci il yanvarın 1-nə 6 960,8 mln. manat təşkil edib. 

"Report" Azərbaycan Mərkəzi Bankına (AMB) istinadən xəbər verir ki, dövriyyədə olan nağd pul kütləsi ardıcıl olaraq 3 aydır artır. Belə ki, ötən ilin oktyabr ayında artım 96,9 mln. manat və ya 1,56%, noyabrda 41,3 mln. manat və ya 0,66% olub. Dekabr ayında isə artım 628,6 mln. manat və ya 9,9% təşkil edib. Nəticədə, ötən ilin əvvəli ilə müqayisədə nağd pulun həcmi 1 544 mln. manat və ya 28,5% artıb.

Qeyd edək ki, dövriyyədə olan nağd pulların Azərbaycanda maksimal həddi 2014-cü ilin iyulunda (11 144,4 mln. manat) qeydə alınıb. Hazırkı göstərici isə tarixi maksimal həddən 4 183,6 mln. manat və ya 37,5% aşağıdır.

"Report"un analitik qrupu hesab edir ki,  AMB-nin hazırkı iqtisadi konyunkturada valyutaya tələb yaradan və əlavə hesab etdiyi nağd pulun bir hissəsini bazardan absorbasiya etməsi (o cümlədən, qiymətli kağızlar vasitəsi ilə) nağd pul kütləsinin azalmasına təsir edəcək.