Azərbaycan nümayəndə heyəti Vaşinqtonda bir sıra görüşlər keçirib

Bakı. 8 oktyabr. REPORT.AZ/ Azərbaycan Dövlət Neft Fondu (ARDNF), "Cənub Qaz Dəhlizi" QSC və Maliyyə Nazirliyinin (MN) nümayəndələrindən ibarət heyət maliyyə naziri Samir Şərifovun rəhbərliyi altında oktyabrın 6-7-də Vaşinqtonda (ABŞ) keçirilən Beynəlxalq Valyuta Fondu (BVF) və Dünya Bankı Qrupunun illik toplantısında iştirak edib. Bu barədə "Report"a MN-dən bildirilib.

Məlumata görə, BVF və Dünya Bankına üzv ölkələrin yüksək vəzifəli dövlət və hökumət rəsmiləri, beynəlxalq maliyyə institutları, özəl sektor və vətəndaş cəmiyyəti nümayəndələrinin iştirak etdiyi illik toplantının rəsmi açılış mərasimində ABŞ Prezidenti Barak Obamanın video-müraciəti səsləndirilib, dünya iqtisadiyyatının cari vəziyyəti və gələcək inkişafının əsas istiqamətləri, dayanıqlı və tarazlaşdırılmış inkişaf strategiyaları, yoxsulluğun aradan qaldırılması, maliyyə bazarlarının tənzimlənməsi və maliyyə yardımlarının səmərəliliyi, o cümlədən qlobal iqtisadiyyat qarşısında olan çağırışlarla bağlı müzakirələr aparılıb.

Tədbir çərçivəsində S.Şərifovun Dünya Bankının vitse-prezidenti Siril Müller, Çoxtərəfli İnvestisiya Zəmanətləri Agentliyinin rəhbəri və Dünya Bankının icraçı vitse-prezidenti Keiko Honda, Avropa İnvestisiya Bankının vitse-prezidenti Pim van Ballekom, Asiya İnkişaf Bankının vitse-prezidentləri Vençay Canq və Divakar Qupta, habelə bir sıra nüfuzlu kommersiya banklarının rəsmiləri ilə keçirdiyi işgüzar görüşlərdə Azərbaycanın makroiqtisadi vəziyyəti, həyata keçirilən iqtisadi islahatlar haqqında geniş məlumat verilib, eləcə də beynəlxalq maliyyə institutları ilə birlikdə həyata keçirilən layihələrin əhəmiyyəti qeyd olunub və uzunmüddətli uğurlu əməkdaşlığın önəmi vurğulanıb.

Görüşlərdə həmçinin, “Şahdəniz” qaz-kondensat yatağının istismarının ikinci mərhələsinin işlənməsi, bu zaman hasil ediləcək təbii qazın nəqlini nəzərdə tutan Cənub Qaz Dəhlizi layihəsinin maliyyələşdirilməsində qeyd olunan təşkilatların iştirakı və digər əməkdaşlıq perspektivləri ilə bağlı məsələlər ətrafında fikir mübadiləsi aparılıb.

Səfər zamanı Azərbaycan nümayəndə heyəti həmçinin ABŞ dövlət katibinin iqtisadi və biznes əlaqələri üzrə köməkçisi Çarls Rivkin, Dövlət Departamentinin beynəlxalq enerji məsələləri üzrə xüsusi elçisi və əlaqələndiricisi Amos Hokştayn və ABŞ maliyyə nazirinin beynəlxalq bazarlar və inkişaf üzrə köməkçisi Marisa Laqo ilə görüşlər keçirib. Bu görüşlərdə ikitərəfli ticari-iqtisadi əməkdaşlığın inkişafı, enerji sahəsində iki ölkə arasındakı ənənəvi strateji əməkdaşlığın davam etdirilməsi, o cümlədən Cənub Qaz Dəhlizi layihəsinin həyata keçirilməsi ilə bağlı ABŞ hökumətinin verdiyi dəstək Azərbaycanda yüksək qiymətləndirildiyi qeyd olunub, regionda trans-kontinental daşımaların təşviqi üzrə səyləri və görülən işlərin vacibliyi vurğulanıb, transmilli layihələr və qarşılıqlı maraq doğuran digər məsələlər üzrə beynəlxalq maliyyə təşkilatları çərçivəsində sıx əməkdaşlıq edilməsi ətrafında müzakirələr aparılıb.