Azərbaycan Əmanətlərin Sığortalanması Fondu “Dəmir Bank”ın işçilərinin tələblərinin ödənilməsinə başlayır

Azərbaycan Əmanətlərin Sığortalanması Fondu (ADIF) ləğv prosesində olan “Dəmir Bank” ASC-nin kreditorlarına müraciət edib.

“Report”un məlumatına görə, müraciətdə bildirilir ki, “Banklar haqqında” qanuna əsasən, Bankın müflis elan olunmasına dair məhkəmə qərarının qəbul edildiyi tarixdən əvvəlki 6 aydan çox olmayan dövr üçün ödənilməli müavinətlərin, əmək haqlarının verilməsi haqqında bankın işçilərinin və keçmiş işçilərinin tələbləri üzrə ödəniş iyulun 29-dan başlanacaq.

Tələblərin ödənişi nağdsız qaydada həyata keçiriləcək. Bununla bağlı Fondun Bakı şəhəri, Xətai rayonu, Babək prospekti, 16 ünvanında yerləşən inzibati binasına müvafiq sənədlərlə (bank rekvizitlərini göstərməklə) müraciət etmək lazımdır.