Xaçmazda sahibkarlara ixracla bağlı portal təqdim edilib

Bakı. 11 mart. REPORT.AZ/ "Azexport" portalının Xaçmaz rayonunda keçirilən növbəti tədbirinə Quba, Qusar, Siyəzən və Şabrandan olan sahibkarlar qatılıb. İqtisadi İslahatların Təhlili və Kommunikasiya Mərkəzindən "Report"a daxil olan məlumata görə, 100-dən artıq iş adamının iştirak etdiyi görüşdə Xaçmaz rayon icra hakimiyyəti başçısının müavini Yetkin Mehmanov bildirib ki, son illər ölkədə aparılan iqtisadi islahatlar nəticəsində bu sahədə mühüm nailiyyətlər əldə edilib.

"Azexport.az" portalının rəhbəri Zaur Qardaşov çıxış edib. Görüşdə portalın funksionallığı, Azərbaycan istehsalçıları barədə vahid məlumat bazasının işləmə prinsipi, eyni zamanda, portalın ixracatçılara təklif etdiyi əlavə imkanlardan bəhs edilib, həmçinin "Azexport.az"a inteqrasiya olunmuş milli və beynəlxalq ödəniş sistemləri, nəqliyyat və logistika xidmətləri, real rejimdə tərcümə xidməti və Azərbaycan məhsullarının beynəlxalq ticarət platformalarında yerləşdirmə imkanları barədə geniş məlumat verilib.

Bildirilib ki, "Azexport" təchizat zənciri üzrə bütün xidmətlərə - sertifikatlaşdırma, nəqliyyat, logistika, bazarlara çıxış, ödəmə imkanları yaradır, Rəqəmsal Ticarət Qovşağı vahid ixrac pəncərəsini təqdim edəcək. Bununla da, sahibkarlar daha az resurs sərf etməklə ixrac prosedurlarını daha sürətlə həyata keçirəcəklər. Rəqəmsal Ticarət Qovşağı həm də elektron pul kisəsi və elektron imzaların qarşılıqlı tanınmasını təmin etməklə sahibkarlarımızın xarici tərəfdaşlarla əlaqələrini daha da asanlaşdıracaq. Rəqəmsal Ticarət Qovşağı həm online, həm də offline qaydada xidmət göstərəcək.

Görüşdə "Azexport" portalı üzərindən sifariş alan sahibkarlar da çıxış ediblər.

Qeyd edək ki, bu, artıq iqtisadi rayonlarda keçirilən altıncı görüşdür. İndiyədək portalın Şəki, Şamaxı, Gəncə, Yevlax, Lənkəranda sahibkarlarla görüşü baş tutub.

"Azexport.az" portalına Yaponiya, Niderland, Çin, Rusiya, Gürcüstan, Misir, Belarus, Pakistan və digər ölkələrdən olmaqla, əsasən şərab, toyuq əti, yumurta, müxtəlif şirələr, quru süd, mineral sular, alma, viski və digər məhsullara dair sifarişlər gəlir. Sahibkarların tam məlumatlılığını təmin etmək, onların problemlərini dinləyib müzakirə etmək üçün "Azexport" komandası indiyə qədər Bakının rayonlarında və bölgələrdə minlərlə sahibkarla görüş keçirib. Növbəti belə görüş martın 18-də İmişli şəhərində Aran iqtisadi zonasının sahibkarları ilə olacaq.