İndiyə qədər mineral gübrələrin qiymətinə tətbiq edilən güzəştlə bağlı 102 mln. manatdan çox subsidiya ödənilib

Bakı. 23 noyabr. REPORT.AZ/ Bu gün Kənd Təsərrüfatı Nazirliyində, nazirinin müavini İlham Quliyevin sədrliyi ilə kənd təsərrüfatı məhsullarının istehsalçılarına hüquqi və fiziki şəxslər tərəfindən satılan mineral gübrələrin qiymətinə tətbiq edilən güzəştin məbləğinin ödənilməsi üzrə Respublika Komissiyasının növbəti iclası keçirilib.

“Report” xəbər verir ki, bu barədə İ.Quliyev özü məlumat verib.

Onun sözlərinə görə, iclasda sahibkarlara subsidiların ödənilməsi ilə bağlı qərar qəbul edilib və lazımi sənədlər Maliyyə Nazirliyinə göndərilib.

“Fermerlərin gübrəyə təlabatı artıb. Hazırda bu tələbatın 20%-ni ödəyirik. İndiyə qədər mineral gübrələrin qiymətinə tətbiq edilən güzəştlə bağlı 102 mln. manatdan çox subsidiya ödənilib", - nazir müavini qeyd edib.