Naxçıvanda dövlət qeydiyyatına alınmış daşınmaz əmlakların sayı 20,6 faiz artıb

Naxçıvan Muxtar Respublikası Daşınmaz Əmlak və Torpaq Məsələləri üzrə Dövlət Xidməti tərəfindən tətbiq edilən yeniliklər, göstərilən xidmətlərin müasirləşdirilməsi daşınmaz əmlakın qeydiyyatını sadələşdirib. 2020-ci illə müqayisədə ötən il dövlət reyestrində qeydiyyata alınan daşınmaz əmlakların sayı 20,6 faiz artıb.

Bu barədə “Report” Naxçıvan Muxtar Respublikası Daşınmaz Əmlak və Torpaq Məsələləri üzrə Dövlət Xidmətinə istinadən xəbər verir.

2021-ci il ərzində Naxçıvan şəhəri üzrə 3 216, Şərur rayonu üzrə 1 346, Babək rayonu üzrə 1 247, Ordubad rayonu üzrə 487, Culfa rayonu üzrə 525, Şahbuz rayonu üzrə 373, Kəngərli rayonu üzrə 231, Sədərək rayonu üzrə 78, ümumilikdə, muxtar respublika üzrə 7 503 daşınmaz əmlak obyekti qeydiyyata alınıb.

Həmin obyektlər bölmələr üzrə 2 944 torpaq sahəsi, 1 574 mənzil, 2 762 fərdi yaşayış və bağ evi, 83 qeyri-yaşayış binası, 110 qeyri-yaşayış sahəsi, 30 əmlak kompleksi kimi müəssisədən ibarət olub. 2020-ci illə müqayisədə mənzillərin qeydiyyatsayı 54,5 faiz, fərdi yaşayış evlərinin qeydiyyatsayı isə 31,8 faiz yüksəlib. Daxil olmuş müraciətlər əsasında 2 223 əmlaka dair texniki pasport, 3 470 torpaq sahəsinə dair plan-ölçü, ümumilikdə, 5 693 texniki sənəd tərtib edilib ki, bu da əvvəlki illə müqayisədə 15,3 faiz çoxdur.

Ötən il ərzində 10 ailə təsərrüfatına məxsus qeyri-yaşayış obyekti, 84 ailə təsərrüfatına məxsus həyətyanı təsərrüfat binaları sənədləşdirilib, təsərrüfat fəaliyyəti ilə əlaqədar 51 ailə təsərrüfatının icarəsinə verilmiş 8,15 hektar torpaq sahəsi üzərində hüquqlar dövlət qeydiyyatına alınıb.