Mənzil İnşaatı Dövlət Agentliyinin mənfəəti kəskin artıb

Mənzil İnşaatı Dövlət Agentliyi (MİDA) 2019-cu ili 5,34 milyon manat mənfəətlə başa vurub. Halbuki, qurum 2018-ci ildən 3,015 milyon manat xalis mənfəətlə çıxmışdı.

“Report” xəbər verir ki, ötən il dövlət MİDA-ya əvvəlki illə müqayisədə 8,8% çox – 1,5 milyon manat yardım edib. Hesabat dövründə Agentliyin maliyyə gəlirləri isə 7,72 milyon manat olub ki, bu da 76,6% artım deməkdir.

MİDA 2019-cu ildə ümumi və inzibati xərclərini 60% artıraraq 3,18 milyon manata çatdırıb, 2018-ci ildən fərqli olaraq müvaqilə və maliyyə aktivləri üzrə 693 min manat məbləğində xalis dəyərsizləşmə zərəri ilə üzləşib, icarə öhdəliyi üzrə 7 min manat xərc çəkib.

Bu il yanvarın 1-nə MİDA-nın aktivləri 205,434 milyon manat olub ki, bu da 1 il əvvələ nisbətən 97,9% və yaxud təxminən 2 dəfə çoxdur. Hesabat dövründə Agentliyin öhdəlikləri təxminən 110 dəfə artaraq 34,582 milyon manata, balans kapitalı isə təxminən 65% artaraq 170,852 milyon manata çatıb.

Xatırladaq ki, MİDA ölkə prezidentinin 11 aprel 2016-cı il tarixli fərmanı ilə yaradılıb. Onun nizamnamə kapitalı 100 milyon manatdır. Agentliyin əsas məqsədi ölkə vətəndaşlarının yaşayış sahələrinə olan ehtiyacını ödəmək, onların mənzil-məişət şəraitini yaxşılaşdırmaq, müasir memarlıq üslubunda ekoloji və enerji səmərəliliyi tələblərinə cavab verən çoxmənzilli binaların tikilməsini təmin etmək, habelə bununla bağlı şəhərsalma və tikinti sahələrində dövlət idarəetməsini təkmilləşdirməkdir. Bununla yanaşı, ölkədə çoxmənzilli yaşayış binalarının tikintisinə rəvac vermək, vətəndaşların güzəştlə mənzillər əldə etmələrinə şərait yaratmaq, çoxmənzilli yaşayış binalarının tikintisi üçün ayrılan maliyyə vəsaitlərindən səmərəli istifadə edilməsini təşkil və təmin etmək məqsədilə qurumun tabeliyində “MİDA” MMC yaradılıb.