Efiopiya nümayəndəsi: "Əddis-Əbəbə böyük bir şəhər transformasiyası keçirib"

Efiopiyanın paytaxtı Əddis-Əbəbə son iki ildə böyük bir şəhər transformasiyası keçirib.

"Report" xəbər verir ki, bunu Mühəndislik üzrə Elmlər Doktoru, Strateji Proqramlar Ofisinin Rəhbəri Eşetayehu Kinfu Ümumdünya Şəhərsalma Forumu (WUF13) çəçivəsində keçirilən" Siyasətdən Təcrübəyə: Əddis-Əbəbənin İnsan Yönümlü Şəhər Dönüşümü Səyahəti" adlı tədbirdə deyib.

Onun sözlərinə görə, Efiopiya paytaxtının şəhər transformasiyasına ölkə valyutası ilə trilyonlarla bır cəlb edilib: "Bir çox insan Əddis-Əbəbənin son iki ildə necə böyük bir şəhər transformasiyası keçirdiyindən və bunun olduqca uğurla icra olunduğundan xəbərdardır. Bu, təxminən bir trilyon bır dəyərində olan bir layihədir və şəhər administrasiyası ümumilikdə böyük həcmdə resurs cəlb edə bilib. Şəhər rəhbərliyi şəhər transformasiyası sahələrindən 30 000-ə yaxın insanı başqa yerlərə uğurla köçürməyə nail olub və biz müxtəlif yollarla, o cümlədən dövlət-özəl tərəfdaşlığı vasitəsilə trilyonlarla bır cəlb edə bildik. İdarəedici orqan - Merdən tutmuş idarəetmənin ən aşağı səviyyəsinə qədər şəhər transformasiyasının bütün fəaliyyətlərində yaxından iştirak edirdi. İcma, yəni sakinlər transformasiyanın planlaşdırılmasından xəbərdardırlar və öz rollarını effektiv şəkildə yerinə yetirməyə cəlb olunublar. Deməli, yüksək səviyyəli iştirakçılığın təmin edilməsi çoxsəviyyəli idarəetmənin daha bir pilləsidir".

O, həmçinin hökumətin müxtəlif səviyyələri arasındakı hibrid və şaquli əməkdaşlıq modelinin böhranların qarşısını necə aldığını qeyd edib:"Burada federal hökumətdən tutmuş ən aşağı səviyyə olan "Voreda"ya qədər hamı bu növ transformasiyanı həyata keçirmək üçün əl-ələ verib işləyə bilir. Federal hökumət strategiyaların hazırlanması və layihələrin yaxından monitorinqinə diqqət yetirir, mezzo və mikro səviyyədəki insanlar isə planların effektiv icrasına cavabdehdirlər. Əgər şəhər administrasiyaları və yerli hökumətlər səlahiyyətləndirilərsə, uğur qazanmaq mümkündür".

Qeyd edək ki, 159,75 Efiopiya Bırrı 1 dollara bərabərdir.