Xalça Muzeyində İnna Kostinanın “Təsadüf” adlı fərdi sərgisi açılacaq

Bakı. 13 aprel. REPORT.AZ/ Azərbaycan Xalça Muzeyində aprelin 14-də əməkdar rəssam İnna Kostinanın “Təsadüf” adlı fərdi sərgisi açılacaq. 

Muzeyin mətbuat xidmətindən "Report" a verilən məlumata görə, sərgidə 48 ədəd batika nümunəsi təqdim olunacaq. Bu əsərlər rəssamın isti və soyuq batika texnikaları ilə yaratdığı “Simurq” və “Təsadüf” silsilələrindən olan rəsm nümunələridir.

İnna Kostina ötən əsrin 90-cı illərin sonu – 2000-ci illərin ortalarınadək batika texnikası ilə “Simurq” mövzusunda silsilə əsərlər yaradıb. Simurq quşu fantastik quş olmaqla, türkdilli xalqların mifologiyasında çox məşhur bir varlıq idi. “Simurq” silsiləsi Azərbaycanın orta əsrlər miniatür sənətini və qotik kilsələrin monumental şəbəkələrini xatırladır. Bu “Səmavi” sənətdir.

2016-cı ilin oktyabr ayında isə rəssamın “İstidir, qaqaş” adlı sərgisi keçirildi. İ.Kostina yaratdığı silsilə əsərlərində gündəlik həyatın reallıqlarını qrotesk formada əks etdirir. Bu silsilədən olan rəsmlərdə qadın və kişi obrazları öz dolğun həyatlarını yaşayırlar. Ancaq bu həyat cismani varlığın yeknəsəq ritmlərinin alatoranlığında keçir.

Bu iki layihədən sonra Kostinanın yaradıcılığında növbəti çevriliş baş verir. Rəssam iki silsilədən olan elementləri birləşdirərək, “Təsadüf” adlı yeni batik silsiləsi yaradır. Burada mifoloji Simurq quşu yerə enərək, gündəlik həyatın sevimli və cazibədar qəhrəmanları bizim müasirlərimizin yaşadığı torpağa öz mistik enerjisini ötürür. Bu silsilədə Mif və Reallıq varlığın vahid axınında qovuşurlar.

Sərgi mayın 2-dək davam edəcək.