Müəllif Hüquqları Agentliyi Azərbaycanda pirat film saytlarının fəaliyyəti ilə bağlı açıqlama verib

Bakı. 17 iyul. REPORT.AZ/ Pirat saytlar icazəsiz olaraq dataların yayımı ilə məşğuldurlar. Azərbaycanda isə açıq şəkildə fəaliyyət göstərən və reklamlardan gəlir əldə edərək pirat yayımını davam etdirən bu saytlara giriş üçün heç bir qadağa tətbiq olunmayıb. Mətbuatda dəfələrlə mövzu ilə bağlı yazılar yazılmasına baxmayaraq, bu saytlar hələ də öz pirat fəaliyyətini davam etdirir. Qanunla ağır cəza almayacaqlarını bilən bu insanlar yalnız kinoteatrlara deyil, filmin yaradıcı heyətinə, bir sözlə incəsənətin inkişafına da böyük zərbə vururlar.

Ölkə mətbuatında video.az, enter.az, myvideo.az kimi pirat saytların ölkəyə yeni gətirilən filmlərin yayımı ilə məşğul olduqları ilə bağlı yazılar dərc olunub. “Report” qeyd edilən problemlə bağlı vəziyyəti araşdırıb.

Müəllif Hüquqları Agentliyindən "Report"un sorğusuna cavab olaraq bildirilib ki, müəlliflik hüququnun obyektləri olan əsərlərdən istifadə hüququ qanunvericilikdə nəzərdə tutulmuş müəyyən hallar istisna olmaqla müstəsna olaraq müəllifə və ya əsərə müəlliflik hüququnun digər sahibinə məxsusdur. Bu əsərlərdən istifadə müəllif (hüquq sahibi) tərəfindən verilən icazə əsasında həyata keçirilir. Əsərlərdən qeyri-qanuni və icazəsiz istifadə edilməsi qanunvericiliklə müəyyən edilmiş qaydada hüquq pozuntusu yaradır və müvafiq məsuliyyətə səbəb olur.

“Müəlliflik hüququ fərdi hüquq olduğu və bu müstəvidə yaranan hüquq münasibətlərinin tərəfləri də fərdi şəxslər olduğuna görə müəlliflik hüququ pozulduğu hallarda müəllif (hüquq sahibi) qanunvericiliklə müəyyən edilmiş qaydada Müəllif Hüquqları Agentliyinə və ya məhkəməyə yazılı şəkildə müraciət etməlidir. Agentliyə müraciət daxil olduqdan sonra məsələ ilə əlaqədar müvafiq araşdırma aparılır və ekspert rəyi hazırlanır. Müəllif (hüquq sahibi) faktla bağlı “Müəlliflik hüququ və əlaqəli hüquqlar haqqında” qanunun 15, 44, 45, 46-cı maddələri əsasında Agentliyə müraciət etdiyi təqdirdə, Müəllif Hüquqları Agentliyi tərəfindən qanunvericilikdə müəyyən edilmiş qaydada tədbirlər görüləcək”, - Agentlikdən bildirilib.

Bu sahədə yuxarıda adı çəkilən qanunlarla yanaşı, qanunla müəyyən edilmiş müəlliflik hüququnun pozulmasına görə mülki, inzibati və cinayət qanunvericiliyi ilə məsuliyyət nəzərdə tutulur. Nəticədə qeyd olunan saytların hələ nə qədər özfəaliyyət ilə məşğul ola biləcəyi artıq sual altındadır.