Azərbaycanlılar ötən il videooyun bazarında 85 milyon dollar xərcləyiblər

Azərbaycan videooyun bazarının həcmi üzrə dünya ölkələri reytinqində 61-ci yeri tutub.

"Report" xəbər verir ki, bunu "Newzoo" analitik şirkətinin məlumatları təsdiqləyir.

Məlumatlara əsasən, 8 milyon nəfəri internetdən fəal şəkildə istifadə edən Azərbaycan əhalisi 2018-ci ildə videooyun bazarında ümumilikdə 85 milyon dollar xərcləyib.

2018-ci il üzrə reytinqin ilk üç pilləsində Çin (34,4 milyard dollar), ABŞ (31,535 milyard dollar) və Yaponiya (17,715 milyard dollar) qərarlaşıb.

Rusiya (1,657 milyard dollar) sıralamada 11-ci, Türkiyə (853 milyon dollar) 18-ci, İran (487 milyon dollar) 26-cı, Ermənistan (24 milyon dollar) isə 95-ci yeri tutub.

Gürcüstan 20 milyon dollarlıq göstərici ilə "top-100"lüyü tamamlayır.