Yuxarı
    Bağlamaq

    “Sovetski”də 18 piyada keçidi olacaq

    Ərazidə 8 avtobus dayanacaq məntəqəsi təşkil edilib

    Bakı. 30 iyun. REPORT.AZ/ Bakı Nəqliyyat Agentliyi (BNA) paytaxtın nəqliyyat sisteminin inkişafı baxımından mühüm əhəmiyyət kəsb edən “Sovetski” layihəsi çərçivəsində salınan yeni yollarda nəqliyyatın və əhalinin rahat, təhlükəsiz və maneəsiz hərəkətini təmin etmək məqsədi ilə zəruri tədbirləri davam etdirir.

    “Report” xəbər verir ki, bu barədə qurumun açıqlamasında bildirilib.

    Məlumatda deyilir ki, BNA-nın mütəxəsissləri beynəlxalq məsləhətçi şirkət “GEMMS Group”un əməkdaşları ilə birgə ərazidə rahat, təhlükəsiz və maneəsiz hərəkəti şərtləndirən bütün məqamlarla bağlı müfəssəl təhlillər aparıb. Hazırda layihə çərçivəsində aparılan nişanlanma və yol-cizgi xətlərinin çəkilməsi də məhz bu təhlillərin nəticəsinə uyğun olaraq icra edilir. Nişanlanma və yol-cizgi xətləri şəhərimizin inkişaf edən simasına uyğun olaraq daha müasir tərtibatda həyata keçirilir.

    Belə ki, paytaxtın digər küçə və prospektlərindən fərqli olaraq burada svetaforlarla nizamlanan piyada keçidləri qanunvericiliyin tələblərinə uyğun olaraq qırıq xətlərlərlə işarələnib. Piyadaların yolun hərəkət hissəsində diqqətli olmaları üçün yerə xəbərdaredici məlumatlar yazılacaq. “Sovetski” layihəsi çərçivəsində salınan yeni yollarda fiziki imkanları məhdud və uşaq arabası ilə olan şəxslərin də rahat hərəkət etməsi mümkün olacaq.

    BNA-nın təşəbbüsü ilə səkilərdə müasir tərtibatda panduslar qoyulacaq. Analoji pandusların yaxın vaxtlarda paytaxtın digər küçə və prospektlərində də qoyulmasına başlanılacaq. “Sovetski” layihəsi çərçivəsində salınan yeni yollarda ümumilikdə 18 eynisəviyyəli piyada keçidlərinin təşkil edilməsi nəzərdə tutulub. Bunlardan 5 ədədi nizamlanmayan, 13 ədədi isə svetoforla nizamlanan piyada keçidi olacaq. Nizamlanmayan piyada keçidlərində də piyadaların təhlükəsizliyinin təmin edilməsi məqsədi ilə sarı sayrışan işıqlar yerləşdiriləcək.

    Eyni zamanda layihə çərçivəsində qeyd edilən yollarda 8 avtobus dayanacaq məntəqəsi təşkil edilib. “Cib” tipli dayanacaq məntəqələrinə avtobusların rahat giriş-çıxışının təmin edilməsi məqsədilə normalara uyğun şəkildə inşa edilib.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi