Londona qar yağması 100-dən çox aviareysin təxirə salınması ilə nəticələnib

Bakı. 17 mart. REPORT.AZ/ Böyük Britaniyanın paytaxtı Londona güclü qar yağması səbəbindən bu gün şəhərin Hotrou Hava Limanından həyata keçirilməli olan 100-dən çox aviareys təxirə salınıb.

Bu barədə "Report" Rusiya mətbuatına istinadən xəbər verir. 

Londonda havanın temperaturu 5 dərəcə şaxta olduğu üçün təhlükəsizlik baxımından ABŞ-ın, eləcə də Avropanın bir sıra şəhərlərinə uçuşların yerinə yetirilmədiyi bildirilir. Bununla belə, Londondan Bakıya və əks istiqamətdə aviareyslərdə problem yoxdur. 

Heydər Əliyev Beynəlxalq Aeroportundan "Report"a bildirilib ki, "Azərbaycan Hava Yolları" QSC (AZAL) və "British Airways" şirkəti sözügedən istiqamət üzrə uçuşları normal yerinə yetirir.