"Geely" avtomobil şirkəti "Mercedes"ə ortaq olub

Bakı. 24 fevral. REPORT.AZ/ Çinin "Geely" şirkətinin rəhbəri "Daimler" şirkətinin 9,69% səhmlərini alıb. "Report" RBK agentliyinə istinadən xəbər verir ki, sövdələşmənin məqsədi çinli şirkətin elektromobil istehsalında yeni texnologiyalara çıxış əldə etməsidir.

"Reuters" agentliyinin yaydığı məlumata görə, şirkətin rəhbəri Li Şufu 9 mlrd. dollar həcmində 9,69% "Mercedes" markalı avtomobilləri istehsal edən "Daimler" şirkətinin səhmlərini toplayıb. "Geely" elektromobillərlə yanaşı, pilotsuz avtomobil istehsalında da almaniyalı şirkətlə ortaqlıq qurmağı hədəfləyir.

"Daimler" xəbəri təsdiqləyərək innovasiyalarda maraqlı olan yeni investoru salamlayıb. Qeyd edək ki, "Geely" bundan əvvəl Malayziyanın "Proton" avtomobil şirkətinin səhmlərinin 49%-ni və "Volvo"nun 3,3 mlrd. dollarlıq səhmlərini alıb.