Yuxarı

​Fransa şirkəti "Azərsu"nun əməkdaşlarına təlim keçir

Müştəri məlumat bazasının təkmilləşdirilməsi barədə xarici mütəxəssislər tərəfindən məlumatlar veriləcək

Bakı. 4 fevral. REPORT.AZ/ "Azərsu" ASC ilə "Suez Environnement" şirkəti (Fransa) arasında bağlanmış "Praktiki təlim, nou-hau ötürülməsi və texniki yardıma dair müqavilə" çərçivəsində "Fakturalanmayan su sərfinin azaldılması" mövzusunda təlim başlayıb. Bu barədə "Report"a "Azərsu"nun mətbuat xidmətindən məlumat verilib.

"Suez Environnement" ilə "Azərsu"nun mütəxəssislərinin iştirakı ilə təşkil olunan təlimə Səhmdar Cəmiyyətin Aparatı və yerli sukanal idarələrinin müştəri xidmətləri şöbələrinin rəisləri cəlb olunub.

Təlimin ilk günü iştirakçılara su təchizatında itkilər, onların aşkarlanması və hesablanması barədə məlumat verilib. "Suez Environnement" şirkətinin müştəri xidmətləri üzrə mütəxəssisi Yanik Bonom müştəri məlumat bazasının yaradılması, riskli abonentlərə nəzarət, sudan qanunsuz istifadənin aşkarlanması, coğrafi informasiya sisteminin tətbiqi və inventarlaşdırma sahəsində dünya təcrübəsi barədə təlim iştirakçılarını ətraflı məlumatlandırıb.

Təlim müddətində içməli sudan qeyri-qanuni istifadənin, texniki itkilərin qarşısının alınması, müştəri məlumat bazasının təkmilləşdirilməsi barədə xarici mütəxəssislər tərəfindən məlumatlar veriləcək, bir sıra xarici ölkələrin təcrübəsi təqdim olunacaq.

Qeyd edək ki, "Azərsu" ilə "Suez Environnement" arasında 12 may 2014-cü il tarixdə Bakıda imzalanmış "Praktiki təlim, nou-hau ötürülməsi və texniki yardıma dair müqavilə" kadr hazırlığı və təcrübə mübadiləsi sahəsində əməkdaşlığı nəzərdə tutur. Sazişə əsasən, qarşıdakı 5 ildə 38 peşə və ixtisas üzrə 4 500 işçi təlimlərə cəlb olunacaq. Eyni zamanda, perspektivdə təlimlərin keyfiyyətlə təşkil edilməsi məqsədilə bu mərkəzdə 250 təlimçi hazırlanacaq.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi