Bakıda nəqliyyat sektorunda fərdi dispetçer xidmətinin ləğvi gözlənilir

Bakı. 13 iyul. REPORT.AZ/ "Gələcəkdə Bakıda hər bir marşrut xətt üçün nəzərdə tutulan dispetçer xidmətinin ləğvi nəzərdə tutulub". 

Bunu "Report"a açıqlamasında Bakı Nəqliyyat Agentliyinin İctimaiyyətlə əlaqələr şöbəsinin rəhbəri Nuridə Allahyarova bildirib.

Onun sözlərinə görə, artıq paytaxtda bu cür xidmət mərkəzləşdirilmiş qaydada həyata keçiriləcək: "Hazırda dispetçer xidməti göstərən şəxslərin avtobuslara sərnişin topladıqları məlumdur. Lakin tezliklə yekunlaşacaq Bakının Vahid Nəqliyyat Konsepsiyasında bu cür xidmət növü artıq mövcud olmayacaq, yəni hər daşıyıcının öz dispetçeri olmayacaq. Artıq bütün marşrut xətləri üzrə Bakı Nəqliyyat Agentliyi tərəfindən idarə olunan və ona tabe olan xidmət fəaliyyət göstərəcək".

Qeyd edək ki, Bakıda yaradılan Nəqliyyat Mübadilə Mərkəzlərində də belə dispetçer xidmətləri fəaliyyət göstərəcək.