Yuxarı
    Bağlamaq

    Azərbaycanda ötən il torpaq istifadəsi ilə bağlı 1 300-ə yaxın qanun pozuntusu aşkarlanıb

    İndiyədək aparılan monitorinqlər nəticəsində 4900-ə yaxın pozulma halları aşkarlanıb

    Bakı. 8 fevral. REPORT.AZ/ Əmlak Məsələləri Dövlət Komitəsi (ƏMDK) torpaqlardan səmərəli istifadə ilə bağlı Bakı şəhəri və regionlarda aktiv monitorinqlərin və reydlərin keçirilməsini davam etdirir. 

    Komitənin mətbuat xidmətindən "Report"a verilən xəbərə görə, burada başlıca məqsəd torpaqlardan səmərəli, qənaətli və təyinatına uyğun istifadəni təmin etməkdir.

    İndiyədək komitənin torpaq müfəttişləri tərəfindən aparılan monitorinqlər nəticəsində 4 900-ə yaxın, 2016-cı il ərzində isə 1 300-ə yaxın torpaq istifadəsi ilə bağlı qanunvericiliyin tələblərinin pozulması halları aşkar edilib.

    Operativ qaydada yerlərdə qanunvericiliyin tələblərinə əsasən tədbirlər görülüb və pozuntu hallarının qarşısı alınıb. Belə ki, İnzibati Xətalar Məcəlləsinin tələblərinə əsasən indiyədək 1 100-ə yaxın hal üzrə inzibati protokollar tərtib edilərək inzibati tənbeh vermə haqqında qərarlarla 580 min manatdan çox cərimə tətbiq edilib. Vətəndaşlara torpaq qanunvericiliyi və mühafizə zolaqları ilə bağlı tələblər izah olunur, tətbiq olunan cərimələrin 30 gün ərzində büdcəyə ödənişinin məcburiliyi, əks halda qanuna uyğun tədbirlərin görüləcəyi, habelə qərardan 10 gün ərzində şikayət vermək hüququ bildirilir.

    Aparılan monitorinq və torpaq reydləri nəticəsində əsasən kənd təsərrüfatı torpaqlarının təyinatının müvafiq qanunvericiliyin tələbləri pozulmaqla məqsədli şəkildə dəyişdirilməsi, dövlət və bələdiyyə torpaqlarının qeyri-qanuni zəbt olunması, mülkiyyət sənədi olmadan torpaqlar üzərində tikinti-quraşdırma işlərinin aparılması, mühafizə zolaqları ilə bağlı qanunvericiliyin tələblərinin pozulması, torpaqların üst münbit qatının korlanması ilə bağlı olub. Eyni zamanda həyata keçirilən tədbirlər nəticəsində əvvəlki dövrlərdə ayrı-ayrı şəxslər tərəfindən torpaqların zəbt olunması, hasarlanaraq uzun illər istifadəsiz saxlanılması və birbaşa təyinatına uyğun olmayaraq başqa məqsədlərlə istifadəsi halları müəyyən edilib.

    Görülən tədbirlər nəticəsində ölkənin 46 rayonu üzrə icarədə olan lakin istifadəsiz qalan 200 min ha torpaq sahəsinə dair 935 icarə müqaviləsinə xitam verilib və həmin torpaqlar dövlət mülkiyyətinə geri qaytarılıb.

    Eyni zamanda Azərbaycan üzrə icarədə olan dövlət və bələdiyyə torpaqlarının istifadə vəziyyəti göstərilməklə icarəçilərinin ümumi siyahısı hazırlanaraq vahid elektron baza yaradılıb.

    Aparılan araşdırmalar nəticəsində ölkədə mövcud olan özbaşına tikililər və zəbt olunan torpaq sahələri barədə də məlumat bankı yaradılıb.

    Komitə torpaqların qeyri-qanuni və səmərəsiz istifadəsi ilə bağlı monitorinqləri və qanun pozuntularına qarşı tədbirləri bundan sonra da davam etdirəcək. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi