Yuxarı
    Bağlamaq

    AZAL büdcə tarifi üzrə hər iki tərəfə aviabilet qiymətlərini açıqlayıb

    Ölkə daxilində hava nəqliyyatı ilə sərnişindaşıma qiymətləri dəyişməz qalıb

    Bakı. 15 yanvar. REPORT.AZ/ “Azərbaycan Hava Yolları” (AZAL) Azərbaycanın hava limanlarından olan uçuşlarda büdcə tarifi üzrə hər iki tərəfə aviabilet qiymətlərini açıqlayıb. 

    AZAL-dan “Report”a verilən məlumata əsasən, yeni konsepsiya çərçivəsində bu il fevralın 1-dən etibarən “Azərbaycan Hava Yolları”nın daha çox tələbatın olduğu reyslərində ekonom sinfinin üç tarif kateqoriyası - “Budget”, “Discount” və “Comfort” mövcud olacaq. Artıq yanvarın 15-dən etibarən bu tariflər üzrə aviabilet əldə etmək mümkün olacaq.

    Məlumata görə, “Budget”, “Discount” və “Comfort” tarif qaydaları təyyarə göyərtəsində yemək nəzərdə tutmur və yalnız əl yükü (çəkisi 8 kq-dək) daşınmasına icazə verilir. Sərnişin kassada bilet aldığı zamanı əvvəlcədən qaynar yemək sifariş verə bilər, veb-sayt üzərindən sifariş verdiyi halda isə bu barədə call-center vasitəsilə (+99412 598-88-80 və ya *8880) məlumat verə bilər. Eyni zamanda sərnişinlər təyyarə göyərtəsində soyuq qəlyanaltı və içki seçmək imkanı əldə edəcəklər.

    Hər bir baqaja (23 kq-a qədər) görə ödəniş uçuşdan ən azı 12 saat əvvəl 20 avro təşkil edəcək. Baqaja görə göstərilən vaxtdan gec ödəniş həmin qiymətdən 5 avro baha olacaq.

    Aşağıda cədvəldə qeyd edilən istiqamətlər üzrə ən ucuz aviabiletləri onların dəyişdirilməsi və geri qaytarılmasını nəzərdə tutmayan “Budget” tarifinin əvvəlcədən bron edilməsi zamanı almaq mümkün olacaq. “Discount” tarifinin qaydaları 40 avro məbləğində cərimə olunmaqla uçuşa qədər aviabileti geri qaytarmaq və ya vaxtını dəyişdirmək imkanı verəcək. “Comfort” tarifi üzrə aviabileti uçuşa qədər əlavə maliyyə sanksiyaları olmadan, uçuşdan sonra isə cərimə olunmaqla dəyişmək və ya geri qaytarmaq mümkün olacaq.

    Qeyd edək ki, Beynəlxalq Hava Nəqliyyatı Assosiasiyasının (İATA) reqlamentinə əsasən, qlobal bron sistemləri vasitəsilə bron edilən Azərbaycanın bütün beynəlxalq sərnişin aviadaşımalarının qiymətləri vahid Avropa valyutası olan avro ilə formalaşır. Bu qarşılıqlı hesablaşma qaydası İATA-nın Avropa zonasının digər ölkələrində də tətbiq olunur.

    AZAL-dan bildirilib ki, ölkə qanunvericiliyinə əsasən bütün hesablaşmalar ödəniş günü Mərkəzi Bankın rəsmi məzənnəsi üzrə manatla həyata keçirilir.

    Xatırladaq ki, ölkə daxilində hava nəqliyyatı ilə sərnişindaşıma qiymətləri dəyişməz qalıb. Belə ki, Bakı-Naxçıvan reysinin qiyməti 50 manat, Bakı-Gəncə reysinin qiyməti isə 30 manatdır.

    "Budget" tarifi üzrə istiqamətlərin qiymətləri (avro ilə)

    İstiqamət (hava limanı) Bir tərəfə (uçuş Bakıdan olmaqla)

    Hər iki tərəfə (uçuş Bakıdan olmaqla)
    Tbilisi 69 99
    Tehran 79 99
    Aktau 79 99
    Mineralnıye Vodı 79 99
    Moskva ("Vnukovo") 89 129
    Moskva ("Domodedovo") 89 129
    İstanbul ("Sabiha Gökçen") 89 139
    Alanya 89 139
    İstanbul ("Atatürk") 99 139
    Antalya 99 139
    Dubay 99 139
    Kazan 99 129
    Ankara 109 149
    Kiyev 109 149
    Minsk 119 149
    Sankt-Peterburq 129 199
    Lvov 139 199
    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi