Yuxarı

Bəstəkarlıq təhsili almış ilk azərbaycanlı qadının əsərlərindən ibarət disk buraxılacaq

2016-cı ildə 100 illik yubileyi qeyd olunacaq Ədilə Hüseynzadə dahi Üzeyir Hacıbəylinin tələbəsi olub

Bakı. 17 dekabr. REPORT.AZ/ Azərbaycanın əməkdar incəsənət xadimi, Üzeyir bəy Hacıbəylinin tələbəsi, bəstəkarlıq təhsili almış ilk qadın Ədilə Hüseynzadənin əsərlərindən ibarət disk buraxılacaq.

Bunu "Report"a açıqlamasında musiqişünas alim Səadət Qarabağlı bildirib.

O qeyd edib ki, gələn il aprelin 28-də Ədilə Hüseynzadənin 100 illik yubileyidir və bu münasibətlə mərhum sənətkarın əsərlərindən ibarət yeni musiqi diski işıq üzü görəcək: "Ədilə Hüseynzadə dahi Üzeyir bəyin sevimli tələbələrindən olub. XX əsrin 40-cı illərində Üzeyir Hacıbəylinin xeyir-duası ilə musiqi sahəsinə gəlib, 1942-1948-ci illərdə Azərbaycan Dövlət Konservatoriyasının xalq musiqisi şöbəsində Üzeyir bəydən dərs alıb. 1953-cü ildə təhsilini başa vurub. O, Azərbaycan Dövlət Konservatoriyasını bəstəkarlıq ixtisası üzrə bitirmiş ilk azərbaycanlı qadındır. Ədilə Hüseynzadə bir çox janrlarda uğurla çıxış edərək simfonik poema, simli kvartet, kantata, xor miniatürləri yaradıb. Lakin bəstəkarın yaradıcılığında romans janrı daha çox üstünlük təşkil edib. Milli musiqimizdə romans janrının təşəkkülündə onun özünəməxsus yeri var". 

S.Qarabağlı bildirib ki, Ə.Hüseynzadənin Nizaminin sözlərinə yazılmış "Vəslin həvəsi" romansı Azərbaycanın vokal silsiləsinin uğurlu əsərlərindən sayılır: "Ədilə xanımın 100 illik yubileyi münasibətilə nəvəsi Səbinə Əliyeva ilə birlikdə disk buraxdırmağı düşünürük. Diskə simli alətlər üçün kvartet, xor əsərləri, fortepiano və violençel üçün sonatino romanslar daxil ediləcək. Ədilə xanımın əsərlərini şəxsi ailə arxivindən, radionun Qızıl Fondundan və Dövlət Arxivindən əldə etmişik".

Xatırladaq ki, Ədilə Hüseynzadə 1916-cı ildə Bakıda, İçərişəhərdə anadan olub. O, Üzeyir Hacıbəylinin "Arşin mal alan" operettası əsasında 1945-ci ildə çəkilmiş bədii filmdə Asyanın vokal partiyasını səsləndirib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi