Yuxarı

"Milli mətbuatımız istiqlal yolumuz" silsiləsindən növbəti sənədli film nümayiş olunub

Film görkəmli ictimai xadim, yazıçı, jurnalist və tərcüməçi Ceyhun bəy Hacıbəyliyə həsr olunub

Bakı.9 iyul. REPORT.AZ/ Azərbaycan Mətbuat Şurası «Milli mətbuatımız istiqlal yolumuz» silsiləsindən növbəti sənədli filmin nümayişini edib.

"Report" xəbər verir ki, Azərbaycan Mətbuat Şurasının «Milli mətbuatımız istiqlal yolumuz» silsiləsindən növbəti sənədli filmi görkəmli ictimai xadim, yazıçı, jurnalist və tərcüməçi Ceyhun Hacıbəyliyə həsr olunub.

Azərbaycan milli mətbuatının 140 illik yubileyi ərəfəsində ərsəyə gəlmiş «Durun gedək evimizə…» filminin ilk nümayişi Qəbələdə baş tutub.

«Azərbaycan milli mətbuatı -140: inkişaf yolu və müasir dövrün çağırışları» çərçivəsindəki konfransda reallaşdırılmış nümayişi MŞ İdarə Heyətinin üzvləri, kütləvi informasiya vasitələrinin rəhbərləri, dövlət rəsmiləri, yerli ictimaiyyətin və mətbuat orqanlarının nümayəndələri izləyiblər. Filmdə C.Hacıbəylinin həyat yolunun spesifik cəhətləri, onun Azərbaycanda milli özünüdərk proseslərindəki xidmətləri, ictimai xadim, yazıçı və jurnalist kimi fəaliyyəti sadalanıb. Bu zaman yerli və xarici ölkələrdəki arxivlərin materiallarına istinad edilib.

Qeyd edək ki, «Durun gedək evimizə…» filminin layihə rəhbəri MŞ sədri Əflatun Amaşov, ideya rəhbəri MŞ İdarə Heyətinin üzvü, Milli Məclisin deputatı Cavanşir Feyziyev, ssenari müəllifi isə tanınmış telejurnalist Bəxtiyar Qaracadır.

İndiyədək «Milli mətbuatımız istiqlal yolumuz» silsiləsindən görkəmli icimai-siyasi xadimlər - Həsən bəy Zərdabiyə, Əli bəy Hüseynzadəyə, Məmməd Əmin Rəsulzadəyə, Əhməd bəy Ağaoğluya, Məmmədağa Şaxtaxtlıya, həmçinin Azərbaycanda ilk qadın mətbuat orqanı olan «İşıq» qəzetinin fəaliyyətinə həsr olunmuş sənədli filmlər çəkilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi