Yuxarı

Yaxın on il ərzində dünyada 1800-dən çox yeni peyk orbitə buraxılacaq

Bu proses bazara 300 mlrd. dollar məbləğində gəlir gətirəcək

Bakı. 2 mart. REPORT.AZ/ Yaxın on il ərzində dünyada 1800-dən çox yeni peyk orbitə buraxılacaq. “Report” “Mediasat”a istinadən xəbər verir ki, bu prosesin bazara 300 mlrd. dollar məbləğində ümumi gəlir gətirəcəyi bildirilib.

Bu barədə "Northern Sky Research” (NSR) agentliyinin hesabatında deyilib ki, yeni peyklər arasında bütün forma, növ və kateqoriyadan olan aparatlar var. Bunlar həmçinin çəkisi 50 kq-lıq “mini peyk”lər və rabitə xidmətləri göstərən və çəkisi 6 tondan çox olan nəhəng aparatlardır. Yeni şirkətlər arasında "Google” və aşağı yerətrafı orbitə çoxlu peyk çıxarmağı planlaşdıran Riçard Brensonun şirkəti yer alıb.

Yeni peyklərə yüksək tələbat 2013-cü ildə də müşahidə olunub və 2014-cü ildə bu tendensiya davam edib. Belə ki, ötən il dünyada orbitə 116 peyk çıxarılıb, daha 149 yeni aparat sifariş edilib. 

“NSR” nümayəndələri bildirib: “Kommersiya şirkətlərindən edilən sifarişlər dövlət və hərbi sifarişlərin sayını 2010-cu ildən ilk dəfə ötüb ki, buna da kosmik proqramların büdcəsinin maliyyələşdirilməsinin azalması və orbitdə peyk qruplarının cüzi artımı səbəb olub. Sektorun 2014-cü ildə müşahidə olunan ümumi artımının 2015-ci ildə də saxlanacağı gözlənilir”.

Qeyd olunur ki, ənənəvi geostasionar rabitə peyklərinin istehsalı və buraxılışının sahə üçün ən gəlirli seqment kimi qalacağına baxmayaraq, peyk texnologiyaları getdikcə daha çox istifadəçini əhatə edəcək.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi