Yuxarı

Azərbaycanlı nazir Avstriyanın İKT və nəqliyyat sektorundakı iri şirkətlərin rəhbərləri ilə görüşüb

© Report

Bakı. 5 mart. REPORT.AZ/ Azərbaycanın nəqliyyat, rabitə və yüksək texnologiyalar naziri Ramin Quluzadə Avstriyaya rəsmi səfəri çərçivəsində bu ölkənin Nəqliyyat və İnnovasiyalar Nazirliyinin və 500 min şirkətin cəmləşdiyi İqtisadiyyat Palatasının birgə təşkil etdiyi “dəyirmi masa”da iştirak edib.

"Report"a daxil olan məlumata görə, "dəyirmi masa”da informasiya-kommunikasiya texnologiyaları (İKT) və nəqliyyat sahələrində fəaliyyət göstərən aparıcı Avstriya şirkətləri, o cümlədən illik büdcəsi 600 mln. avrodan çox olan və Avstriyanın startap layihələrinin maliyyələşdirilməsini həyata keçirən Avstriya Tədqiqatların Təşviqi Agentliyi, elektron hökumət və elektron imza həlləri üzrə Avropanın aparıcı şirkəti olan “Bit Media”, yüksəktexnologiyalı işıqlandırma sistemləri üzrə ixtisaslaşmış “Polaroid”, dayanacaq və dağ-xizək kompleksləri üzrə həllər təklif edən “Ski-DATA” və s. iştirak edib.

Görüş çərçivəsində Avstriyanın startapların təşviqi və ictimai nəqliyyatın tənzimlənməsi sahəsindəki təcrübəsi barədə geniş məlumat verilib və Azərbaycanla bu sahədə əməkdaşlıq imkanları müzakirə edilib. Eyni zamanda Avstriya şirkətlərinin Azərbaycanda həyata keçirilən layihələrdə iştirakı və investisiya imkanları barədə fikir mübadiləsi aparılıb.

Görüşdə Avstriya İqtisadiyyat Palatasının rəhbərliyi ilə özəl şirkətlərin nümayəndələrinin bu ilin may ayında Azərbaycana nəzərdə tutulan səfəri zamanı təfsilatlı təhlillərin aparılması və konkret layihələr üzrə danışıqlara başlanması razılaşdırılıb.

R.Quluzadə səfər çərçivəsində həmçinin Vyananın Beynəlxalq Avtovağzal Kompleksini ziyarət edib və obyektin fəaliyyəti ilə yerində tanış olub.

Məlumat verilib ki, illik sərnişin axını 700 minə yaxın olan Vyananın “Erdberg” vağzalı Avropanın 600 nöqtəsinə sərnişin daşınmasını həyata keçirir. Ziyarət əsnasında bilet satışı, təhlükəsizlik, keçid və minik üçün istifadə olunan proqram təminatı barədə məlumat verilib.

Səfər zamanı Ramin Quluzadə Avstriya Texnologiya İnstitutu və Avropanın aparıcı İKT şirkəti olan SAİL LAB TECH-i də ziyarət edib. Müzakirələr zamanı “ağıllı şəhər”, rəqəmsal təhlükəsizlik, insanların və məhsulların mobilliyi, enerji səmərəliliyi üzrə innovativ həllərin tətbiqinə dair əməkdaşlıq imkanlarına dair fikir mübadiləsi aparılıb. Danışıqlar zamanı azərbaycanlı gənc startapçı və tədqiqatçıların Avstriyada təcrübə keçmələri, Avstriya mütəxəssislərinin iştirakı ilə Bakıda təlimlərin təşkili, birgə tədqiqat layihələrinin həyata keçirilməsi kimi məsələlər müzakirə mövzusu olub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi