Yuxarı

Azərbaycanda hərbi qulluqçuların üst geyimlərinin modeli dəyişdirilib

İritutumlu yanacaq anbarlarının inşa edilməsinə başlanılıb

Bakı. 20 dekabr. REPORT.AZ/ "Müdafiə Nazirliyinin təşəbbüsü və rəhbərliyi ilə hərbi qulluqçuların üst geyimlərinin modelində və digər əşya əmlaklarının keyfiyyətində əsaslı dəyişikliklər baş verib. Bu dəyişikliklər dövlət başçısı tərəfindən təsdiq edilib. Bununla da növbəti ildə şəxsi heyətin təminatında əhəmiyyətli yeniliklər baş verəcək".

"Report"un məlumatına görə, bunu Azərbaycan Müdafiə Nazirliyi Arxa Cəbhə İdarəsinin rəisi polkovnik Talıb Əsədov "Azərbaycan Ordusu" qəzetindəki məqaləsində yazıb.

"Arxa Cəbhə İdarəsi özündə üç mühüm sahəni - yanacaq, ərzaq və əşya xidmətini birləşdirir, bu istiqamətlər üzrə Silahlı Qüvvələrin gündəlik tələbatını təmin edir. Ordu rəhbərliyinin tapşırığına əsasən, qış dövrünə keçidlə əlaqədar sərt iqlim və yüksək dağlıq şəraitində yerləşən hərbi hissələrin əsgərləri sanitar-gigiyenik ləvazimatlar və digər təsərrüfat əmlakları ilə birdəfəlik təmin edilib. Həmçinin bu mövqelərdə şəxsi heyətin içməli suya təlabatı da öz həllini tapıb. Müxtəlif bölgələrdə hərbi maşın və texnikaların yanacağa olan tələbatını yüksək səviyyədə təmin etmək üçün müasir avadanlıqlarla təchiz olunan iritutumlu yanacaq anbarlarının inşa edilməsinə başlanılıb" - T.Əsədov qeyd edib.

O vurğulayıb ki, hərbi hissə və birləşmələrdə şəxsi heyətin keyfiyyətli ərzaqla təminatı, milli yeməklərin hazırlanması ilə əlaqədar bir sıra vacib məsələlər də artıq həll edilib: "Hələ bu vaxta kimi belə həyati əhəmiyyətli məsələlər diqqətdə olmayıb. Məsələn, şəxsi heyətin ərzaqla təminatını yaxşılaşdırmaq məqsədilə Mərkəzi ərzaq anbarında ət məhsullarının qorunması üçün 1 ədəd 1000 tonluq saxlancın, eləcə də Gəncə bölgəsində 500 və Beyləqanda 200 tonluq müasir tipli saxlancların tikintisi artıq yekunlaşmaq üzrədir. Bir sözlə, ordu rəhbərliyinin əsas tələbi ondan ibarətdir ki, hərbi qulluqçuların keyfiyyətli ərzaqla təminatına və gündəlik qidalanmasına görə heç bir problem olmamalıdır".

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi