Şəmkirdə güclü külək fəsadlar yaradıb, bəzi kəndlər işıqsız qalıb

Şəmkir. 28 mart. REPORT.AZ/ Şəmkir rayonunda güclü külək fəsadlar yaradıb, bəzi kəndlər işıqsız qalıb.

"Report"un Qərb bürosunun məlumatına görə, gecə saatlarından başlayaraq əsən güclü külək nəticəsində rayonun bəzi kəndlərində dam örtükləri dağılıb, elektrik dirəkləri aşıb, naqillər sıradan çıxıb və enerjinin verilişi dayanıb. 

Rayonun Muxtariyyə kəndində tərəvəz bitkilərinin becərilməsi üçün salınmış istixanaların örtükləri dağılıb və bəzi qurğularına ciddi ziyan dəyib. 

Şəmkir rayon Fövqəladə Hallar Komisiyasının məlumatına görə, səhər saatlarından görülən işlər nəticəsində hazırda sıradan çıxmış elektirik təsərrüfatında yaranmış problemlər aradan qaldırılıb və kəndlərdə elektrik enerjisinin verilişi bərpa olunub. 

Güclü küləyin rayona vurduğu ziyanın miqdarı isə hələlik məlum deyil.